AL7AYAH: حبة حياة

.....أكثر من قول لا حول ولا قوة إلا بالله العلي العظيم,فإنها كنزمن كنوز الجنة..حديث صحيح......,ما أسفل الكعبين من الإزار فهو في النار..رواه البخاري والنسائي..,يا رسول الله أنهلك وفينا الصالحون؟؟..قال نعم ,إذا كثر الخبث (متفق عليه)..,الوالد أوسط أبواب الجنة..فإن شئت فأضع هذا الباب أو احفظه...,لا يدخل الجنة قاطع ..أي قاطع رحم..(متفق عليه)...,الحياء شعبةمن الايمان ..حديث صحيح..آية الإيمان حب الأنصار..وأية النفاق بغض الأنصار..(رواه البخاري)..من أشار إلي أخيه بحديدة فإن الملائكة تلعنه حتي ينتهي (رواه مسلم)...,سباب المسلم فسوق وقتاله كفر ..(متفق عليه)...,بحسب امرئٍ من الشر أن يحقر أخاه المسلم..(رواه البخاري ومسلم وأصحاب السنن)..ما تواضع أحد لله إلا رفعه ,وما زاد الله عبدا بعفوٍ إلا عزاً...,وتجد شر الناس ذا الوجهين..,الذي يأتي هؤلاء بوجه..وهؤلاء بوجه..(رواه البخاري ومسلم ومالك)...,ذمة المسلمين واحدة ,يسعي بها إدناهم.فمن أخفر مسلما فعليه لعنة الله والملائكة والناس أجمعين.لا يقبل الله منه يوم القيامة عدلاً ولا صرفاً..(رواه مسلم وغيره)...لو أنكم تتوكلون علي الله حق التوكل...لرزقكم كما يرزق الطير..تغدو خماصاً وتروح بطاناً..(رواه أحمد وصححه الألباني)....,إن الله تعالي يبسط يده بالليل ليتوب مسئ النهار..,ويبسط يده بالنهار ليتوب مسئ الليل..حتي تطلع الشمس من مغربها ...(رواه مسلم)...يقول الله-عزوجل- أخرجوا من النار من ذكرني يوماً أو خافني في مقام..رواه البيهقي والترمذي..وقال حديث حسن.....اتقوا الله..وصلوا خمسكم,وصوموا شهركم,وأدوا زكاة أموالكم,وأطيعوا أمراءكم..تدخلوا جنة ربكم..رواه الترمذي..وقال حديث حسن صحيح....,« . . . وهل يكب الناس على وجوههم أو على مناخرهم إلا حصائد ألسنتهم » [رواه الترمذي]....,« إن العبد ليتكلم بالكلمة ما يتبين فيها، يزل بها إلى النار أبعد مما بين المشرق والمغرب » [متفق عليه]....,«اللهم إني أسألك فعل الخيرات وترك المنكرات وحب المساكين،وإذا أردت في الناس فتنة فاقبضني إليك غير مفتون» أخرجه مالك والترمذي..,«ما من مسلم يصيبه أذى, من مرض فما سواه إلا حط الله به سيئاته كما تحط الشجرة ورقها» أخرجه البخاري ومسلم..,«لا يموتن أحدكم إلا وهو يحسن الظن بالله» أخرجه البخاري ومسلم...,«أعذر الله إلى امرئ أخر أجله حتى بلغ ستين سنة» أخرجه البخاري. أي لم يبق عذر لمن بلغ الستين من العمر...,«لا تقوم الساعة حتى تخرج نار من أرض الحجاز تضيء أعناق الإبل ببصرى» أخرجه البخاري ومسلم...,«يقبض الله الأرض يوم القيامة, ويطوي السماء بيمينه, ثم يقول: أنا الملك أين ملوك الأرض» أخرجه البخاري ومسلم...,«ما من صباح إلا وملكان يقولان: يا طالب الخير أقبل, ويا طالب الشر أقصر, وملكان موكلان يقولان: اللهم أعط منفقاً خلفاً, وأعط ممسكاً تلفاً» أخرجه البخاري مختصراً وأحمد..,إذا أراد الله بقوم عذاباً أصاب العذاب من كان فيهم, ثم بعثوا على نياتهم» أخرجه البخاري ومسلم..,« أول ما يقضى بين الناس يوم القيامة في الدماء» أخرجه البخاري ومسلم والنسائي والترمذي..,مثل الصلوات الخمس كمثل نهر جار غمر على باب أحدكم يغتسل منه كل يوم خمس مرات> رَوَاهُ مُسلِمٌ...,يتعاقبون فيكم ملائكة بالليل وملائكة بالنهار، ويجتمعون في صلاة الصبح وصلاة العصر، ثم يعرج الذين باتوا فيكم فيسألهم وهو أعلم بهم: كيف تركتم عبادي؟ فيقولون: تركناهم وهم يصلون وأتيناهم وهم يصلون> مُتَّفَقٌ عَلَيهِ...,من غدا إلى...,بشروا المشائين في الظلم إلى المساجد بالنور التام يوم القيامة> رَوَاهُ أبُو دَاوُدَ وَالتِّرمِذِيُّ...,من شهد العشاء في جماعة كان له قيام نصف ليلة، ومن صلى العشاء والفجر في جماعة كان له كقيام ليلة> قال الترمذي حديث حسن صحيح....,إن بين الرجل وبين الشرك والكفر ترك الصلاة> رَوَاهُ مُسلِمٌ...,إن أول ما يحاسب به العبد يوم القيامة من عمله صلاته، فإن صلحت فقد أفلح وأنجح، وإن فسدت فقد خاب وخسر، فإن انتقص من فريضته شيئاً قال الرب عز وجل: انظروا هل لعبدي من تطوع فيكمل بها ما انتقص من الفريضة؟ ثم تكون سائر أعماله على هذا> رَوَاهُ التِّرمِذِيُّ وَقَالَ حَدِيثٌ حَسَنٌ...,خير صفوف الرجال أولها وشرها آخرها. وخير صفوف النساء آخرها وشرها أولها> رَوَاهُ مُسلِمٌ...,أقيموا الصفوف، وحاذوا بين المناكب، وسدوا الخلل، ولينوا بأيدي إخوانكم، ولا تذروا فرجات للشيطان، ومن وصل صفاً وصله اللَّه، ومن قطع صفاً قطعه اللَّه> رَوَاهُ أبُو دَاوُدَ بإسناد صحيح....,عن عائشة رَضِيَ اللَّهُ عَنها أن النبي صَلَّى اللَّهُ عَلَيهِ وَسَلَّم كان لا يدع أربعاً قبل الظهر، وركعتين قبل الغداة. رَوَاهُ البُخَارِيُّ...,عن ابن عمر رَضِيَ اللَّهُ عَنهُما أنهما سمعا رَسُول اللَّهِ صَلَّى اللَّهُ عَلَيهِ وَسَلَّم يقول على أعواد منبره: <لينتهين أقوام عن ودعهم الجمعات أو ليختمن اللَّه على قلوبهم ثم ليكونن من الغافلين> رَوَاهُ مُسلِمٌ...,إذا دخل أهل الجنة الجنة يقول اللَّه تبارك وتعالى: تريدون شيئاً أزيدكم؟ فيقولون: ألم تبيض وجوهنا؟ ألم تدخلنا الجنة، وتنجنا من النار؟ فيكشف الحجاب، فما أعطوا شيئاً أحب إليهم من النظر إلى ربهم> رَوَاهُ مُسْلِمٌ...,إن في الجنة شجرة يسير الراكب الجواد المضمَّر السريع مائة سنة ما يقطعها> مُتَّفَقٌ عَلَيْهِ...,قال اللَّه تعالى: يا ابن آدم إنك ما دعوتني ورجوتني غفرت لك على ما كان منك ولا أبالي، يا ابن آدم لو بلغت ذنوبك عنان السماء ثم استغفرتني غفرت لك ولا أبالي، يا ابن آدم إنك لو أتيتني بقراب الأرض خطايا ثم لقيتني لا تشرك بي شيئاً لأتيتك بقرابها مغفرة> رَوَاهُ الْتِّرْمِذِيُّ وَقَالَ حَدِيْثٌ حَسَنٌ...,لا تخصوا ليلة الجمعة بقيام من بين الليالي، ولا تخصوا يوم الجمعة بصيام من بين الأيام إلا أن يكون في صوم يصومه أحدكم> رَوَاهُ مُسْلِمٌ.....,لا صلاة بحضرة طعام، ولا هو يدافعه الأخبثان> رَوَاهُ مُسْلِمٌ....,: <إذا دعا الرجل امرأته إلى فراشه فأبت فبات غضبان عليها لعنتها الملائكة حتى تصبح> مُتَّفَقٌ عَلَيْهِ....,لا تباشر المرأة المرأة فتصفها لزوجها كأنه ينظر إليها> مُتَّفَقٌ عَلَيْهِ.....,لا تسموا العنب الكرم؛ فإن الكرم المسلم> مُتَّفَقٌ عَلَيْهِ، وهذا لفظ مسلم....,(من أحدث في أمرنا هـذا مـا لـيـس مـنه فهـو رد ). متفق عليه...,عن أبـي رقــيـة تمـيم بن أوس الـداري رضي الله عنه ، أن النبي صلى الله عـليه وسـلم قـال :( الـديـن النصيحة )....,ما نهيتكم عنه فاجتنبوه ، وما أمرتكم به فأتوا منه ما استطعتم ، فإنما أهلك الذين من قبلكم كثرة مسائلهم واختلافهم على انبيائهم ). رواه البخاري ومسلم....,( دع ما يـريـبـك إلى ما لا يـريـبـك ).رواه النسائي والترمذي وقال حديث حسن صحيح...,( من حسن إسلام المرء تركه ما لا يعـنيه ) .حديث حسن ، رواه الترمذي وابن ماجه....,( لا يحل دم امرىء مسلم [ يشهد أن لا إله إلا الله ، وأني رسول الله ] إلا بـإحـدي ثـلاث : الـثـيـب الــزاني ، والـنـفـس بـالنفس ، والـتـارك لـد يـنـه الـمـفـارق للـجـمـاعـة ).متفق عليه..,( اتـق الله حيثما كنت ، وأتبع السيئة الحسنة تمحها ، وخالق الناس بخـلـق حـسـن ).رواه الترمذي وقال : حديث حسن ، وفي بعض النسخ : حسن صحيح ..,عـن أبي العـباس عـبد الله بن عـباس رضي الله عـنهما ، قــال : كـنت خـلـف النبي صلي الله عـليه وسلم يـوما ، فـقـال : ( يـا غـلام ! إني اعـلمك كــلمات : احـفـظ الله يـحـفـظـك ، احـفـظ الله تجده تجاهـك ، إذا سـألت فـاسأل الله ، وإذا اسـتعـنت فـاسـتـعـن بالله ، واعـلم أن الأمـة لـو اجـتمـعـت عـلى أن يـنـفـعـوك بشيء لم يـنـفـعـوك إلا بشيء قـد كـتـبـه الله لك ، وإن اجتمعـوا عـلى أن يـضـروك بشيء لـم يـضـروك إلا بشيء قـد كـتـبـه الله عـلـيـك ؛ رفـعـت الأقــلام ، وجـفـت الـصـحـف ).رواه الترمذي [وقال : حديث حسن صحيح إن مما أدرك الناس من كلام النبوة الأولى : إذا لم تستح فاصنع ما شئت ).رواه البخاري ...,( الطهور شطر الإيمان ، والحمد لله تملأ الميزان ، وسبحان الله والحمد لله تملأن – أو : تملأ – ما بين السماء والأرض ، والصلاة نور ، والصدقة برهان ، والصبر ضياء ، والقرآن حجة لك أو عليك ؛ كل الناس يغدو ، فبائع نفسه فمعتقها ، أو موبقها ..رواه مسلم ...,كل سلامى من الناس عليه صدقة كل يوم تطلع فيه الشمس تعدل بين اثنين صدقة ، وتعين الرجل فى دابته فتحمله عليها أو ترفع له عليها متاعة صدقة ، والكلمة الطيبة صدقة ، وبكل خطوة تمشيها إلي الصلاة صدقة ، وتميط الأذي عن الطريق صدقة ).رواه البخاري ومسلم...,: ( من رأى منكم منكرًا فلغيره بيده ، فإن لم يستطع فبلسانه ، فإن لم يستطع فبقلبه ، وذلك أضعـف الإيمان ).رواه مسلم ...,( لا تحاسدوا ، ولا تناجشوا ، ولا تباغضوا ، ولا تدابروا ، ولا يبع بعضكم على بيع بعض ، وكونوا عباد الله إخوانا ، المسلم خو المسلم ، لا يظلمه ولا يخذله ، ولا يكذبه ، ولا يحقره ، التقوى ها هنا ) ويشير صلى الله عليه وسلم إلى صدره ثلاث مرات – ( بحسب امرىء أن يحقر أخاه المسلم ، كل المسلم على المسلم حرام : دمه وماله وعرضه ).رواه مسلم ...,( إن الله تعالى كتب الحسنات والسيئات ، ثم بين ذلك ، فمن هم بحسنة فلم يعملها كتبها الله عنده حسنة كاملة ، وإن هم بها فعملها كتبها الله تعالى عنده عشر حسنات إلى سبعمائة ضعف إلى أضعاف كثيرة ، وإن هم بسيئة فلم يعملها كتبها الله عنده حسنة كاملة ، وإن هم بها فعملها كتبها الله عنده سيئة واحدة ).رواه البخاري ومسلم...,( كن في الدنيا كـأنـك غـريـب أو عـابـر سبـيـل ).وكـان ابـن عـمـر رضي الله عـنهـما يقول : إذا أمسيت فلا تـنـتـظـر الصباح ، وإذا أصبحت فلا تـنـتـظـر المساء ، وخذ من صحـتـك لـمـرضـك ، ومن حـياتـك لـمـوتـك ...رواه البخاري ...,( لا يؤمن أحدكم حتي يكون هواه تبعا لما جئت به ..حديث حسن صحيح ...,..سبحانك اللهم وبحمدك أشهد أن لا إله إلا أنت ..أستغفرك وأتوب إليك

Tuesday, October 12, 2010

حبة حياة

شاب مصري ... من أسرة متوسطة ... عينيا خضرا ... أبيض البشرة ... وده مش اعلان أريد عريساً أو عروسة

أنا من الجيل اللي اتربى علشان يطلع ابن ناس .... لكن موصلش لقمة الأدب ... ولا خد نصيبه من الصياعة

اتفرجت على طوائف وأحزاب كتير من بره ومن جوه .... واستقريت على إني من جماعة المسلمين ... الناس الطيبة اللي بتصلي في الجامع الفرض بفرضه – زي ما بيقولوا – بس المهم تدّي لربنا حقه ف كل شيء حتى في معاملة عباده

الكنيسة اللي ورا بيتنا وبتدق كل يوم حد الصبح أجراسها .... علمتني ... إن الشيخ والقسيس ... سهل جداً يكونوا جيران .... خصوصاً وأنا بصلي التراويح في الجامع اللي ف نفس الشارع

اتعلمت ... اركز ع الحتة الحلوة في الناس .... والحتة الوحشة آخد بالي منها علشان متلمسنيش ... وحلو أوي لو غيرتهالهم

واتعلمت ... إن سوء الظن بالنفس ... أحسن كتير ألف مرة من طغيان الطاعة

واتعلمت ... إنه ما زاد الله عبداً بعفو إلا عزاً وما تواضع أحد لله إلا رفعه الله . الحديث عن أبي هريرة في صحيح مسلم

لسه بسمع بوداني كلمة ريسي ف مصر يوم ما سافرت الامارات .... اعتبر اللي انت فيه ده فيلم عربي قديم وهيخلص بنهاية سعيدة وكل الشخصيات هيبقوا ف الخلفية وانت البطل في القصة

ولسه بسمع أبويا يوم ما فوجئت بإن شريكي ف السكن بيشرب الخمر ... وإن غالب الأماكن لا تخلو من الدعارة وكان رده عليّا .... افتكر القابض على دينه كالقابض على الجمر ... مش كل الدنيا ناس بتصحيك للفجر وتحفظوا قرآن سوا

حبي لشخصية الفارس الأبيض على الحصان الأبيض - على رأي يحيى صاحبي - خلتني أمارس دور الملاك في انسحابي من حياة أكتر انسان دفّاني بروحه قبل ما تتكسر المركب و .. و .. "وحال بينهما الموج"

والحاجة الوحيدة اللي جرحتني كانت لما أخويا الكبير سافر علشان يكون آخر واحد فينا كان لسه عايش ف مصر ، لما قاللي أبويا : كنا مربيينكم وبنعلمكم علشان بدل ما نتجمع كلنا لما نكبر ... نلاقي كل واحد فيكم ف بلد

ورديت عليه : مصر ربتنا بطريقة مختلفة يا ابونا ... ولازم نسمع كلام مصر ... مش الجنة تحت أقدام الأمهات برضه؟

ساعتها بس صدّقت أبويا لما قاللي من 10 سنين : احنا – الأسرة – الخمسة زي العُقد لو واحد فينا بعد ... العقد كله هيتوه عن بعضه

أكلي بالشوكة والسكينة على سفرة بيتنا ... ممنعنيش أكون الشخص الشرس اللي يقطع بالسكينة حبل أي عروسة ماريونيت متعجبوش ... ويطلّع عينيها بالشوكة اللي ف ايديه

لسه مصمم إنهم ضحكوا علينا لما كانوا بيجيبوا في الافلام العربي زمان الخير منتصر في النهاية وان الراجل الشرير بيعترف بكل اخطاءه ويطلب السماح

علشان كده اتعلمت .... إن الطيبين مكانهم فوق ف السما مش موجودين ع الأرض

متآمنش لواحد لابس كم طويل وهو بيسلّم عليك ... كف ايده اللي نصه باين ليك ممكن يكون مخبي في الكم الخنجر اللي هيقطع بيه عروقك ويمحيك من الدنيا

لازلت مهتم بإني أجري في ملعب الحياة وأشوط ع الجون .... ومتأكد إن ربنا اللي خالقنا عارف ازاي هيحاسب كل واحد كويس أوي وعارف مصلحتنا فين وبيودّينا ليها

لسه بتطمن أوي لما أقرأ آية : الله ولي الذين ءامنوا يخرجهم من الظلمات إلى النور ... لما ربنا يكون وليّك هتخاف من ايه؟

مفتقد للكثيرين ... وعندي رغبة في مسامحة الكثيرين لكنهم لا يعطوني الفرصة إلا أن أبغضهم أكثر

الحياة اللي احنا عشناها قبل تلات سنين ليس لها أي علاقة بالنكتة البايخة اللي احنا فيها دلوقتي

نكتة ممكن تضحك منها ملء فمك ... قبل ما تعرف إنها حقيقة وتنخرط في البكاء

كلمة أخيرة لأبويا اللي عمري ما قلتله كلمة "أبويا" دي : مكانش لازم تتعب نفسك وتربينا على فكرة ... الدنيا بتربينا بما فيه الكفاية ... واظاهر كده الدنيا مبتربيش غير الطيبين ... لإن الآخرة بتربي ناس تانية

كل اللي فوق ده حاجة جت كده زي ما هيّ .... وعمو بلوجر غير مسئول عن أي لسعان في دماغ الكاتب

32 comments:

موناليزا said...: طب اعلق انا دلؤتى على إيه ولا إيه:)
بجد كلمات محسوسة جدا
خد عندك يا سيدى:)

"اتعلمت ... اركز ع الحتة الحلوة في الناس .... والحتة الوحشة آخد بالي منها علشان متلمسنيش ... وحلو أوي لو غيرتهالهم"

بحاول اعملها دايما:)

"اعتبر اللي انت فيه ده فيلم عربي قديم وهيخلص بنهاية سعيدة وكل الشخصيات هيبقوا ف الخلفية وانت
"البطل في القصة

أوقات كتير بحس بالشعور ده وعشان كده بتقبل الواقع عادى جدا مهما كان فيه:)

" افتكر القابض على دينه كالقابض على الجمر ... مش كل الدنيا ناس بتصحيك للفجر وتحفظوا قرآن سوا"

حقيقة واقعية أدركتها متأخر

بس مافهمتش الجملة دى
"ماصدقتش اني كبرت غير وانا بتصل باخويا ع التليفون وأقوله إني بنفصل عن البنت اللي بحبها "

أصلى أنا انفصلت مرتين ومع ذلك عمرى ماحسيت انى كبرت .. أصل انا من يومى كبيرة:)

" احنا – الأسرة – الخمسة زي العُقد لو واحد فينا بعد ... العقد كله هيتوه عن بعضه"

متفقة مع الجملة دى جدا جدا وعشان كده انا ضد الغربة

"وعندي رغبة في مسامحة الكثيرين لكنهم لا يعطوني الفرصة إلا أن أبغضهم أكثر"

مش كده برضه:)

ملحوظة: انا مش مسئولة عن الرغى الكتير اللى فى التعليق بتاعى وكان الله فى عون اللى هيقرأه.. بس هى جت كده:); October 13, 2010 at 12:20 AM
sakayar said...: موناليزا
تسلمي يا أستاذة وجودك دايماً مشرفني في المدونة
برغم اني متابع حضرتك لكن فيه بعض الكتابات القلم - أو الكيبورد - يعجز عن التعليق عليها ... زي مدونة حضرتك
:)
--------
هعلق بس ع الجملة دي :)
ومع ذلك عمرى ماحسيت انى كبرت .. أصل انا من يومى كبيرة:)
---------
طول عمري بنظر للابتلاءات اللي بتحصل في الحياة على انها مواقف وبتعدّي والواحد بيتعلم .. وأول ما يمر الابتلاء أشعر بإنه محصلش أي حاجة واقول لنفسي متعجب هو الواحد ليه ممرش بأي ابتلاء ف حياته لغاية النهاردة؟
:)
لكن الموقف ده بالذات كان أشد ابتلاءً لي ... احساس داخلي جعلني أشعر بإن لعبة البلاي ستيشن بتاعة الحياة دخلت ف مراحل متقدمة من اللعب .... خلاني احس بإني بجد كبرت بشكل مختلف
ربنا يسعدك ف حياتك يا استاذة ويقر عينيكي بكل الخير اللي بتحلمي بيه ويجزيكي عن كل حياتك خير وسعادة في الدارين
:)
تسلمي مرة تانية على تعليقك اللي بينور المدونة
:); October 13, 2010 at 1:19 AM
Jana said...: مش عارفة ازاى مجيتش هنا قبل كده
!!!!!!
كل ده فاتنى
!
التدوينة دى من التدوينات اللى يصعب التعليق عليها ... بتقول كتير من اللى عايزين نقوله وعجز لساننا عنه
مع اختلاف بسيط فى المواقف كل بحسب خريطة حياته وزحمة تضاريسها; October 13, 2010 at 2:08 AM
sakayar said...: Jana
اكيد مكنتيش تعرفي السكة يا أستاذة
:)
بالظبط ... هي نفس الخريطة عند كل شخص تقريباً
بس كل واحد له مسمياته وأحداثه المختلفة
بصمة العين دايماً مختلفة
:)
نورتيني لأول مرة جنى
:)
ويارب مش تكون الأخيرة; October 13, 2010 at 2:29 AM
الحلم العربي said...: مش عارفة اقولك ايه يا سكايار ...كلامك فعلا محسوس قوي
يمكن لو ما كانتش الدنيا ورتك الوش الوحش ماكنتش هتتعلم كل ده و كلنا كده

انت الصدمة عندك جت في نفس الوقت اللى جات عندي فيه او يمكن انا قبلك بشوية
و لسة الدنيا من ساعتها بتدوس و عمالة تدوس

بس الدنيا دار اختبار هي دي الحقيقة اللى لازم نسلم بيها
و دار فتنة و دار امتحان
و ربنا بيبلي بعضنا ببعض ، ساعات ممكن يكون اقرب القريبين ليك هو سبب فتنتك في الدنيا من غير ما يقصد ..دي حياتنا
بس المهم اننا فعلا نصدق قوي ان ربنا مش هيسبنا لو نصرناه على أنفسنا أولا

ربنا يقويك و يقويني و يقوي كل واحد بيحاول يكون كويس في الدنيا دي
و اذا أراد لعباده فتنة أن يقبضنا اليه غير فاتنين و لا مفتونين

تحياتي; October 13, 2010 at 2:41 AM
sakayar said...: الحلم العربي
كنت لسه عندك دلوقتي حالاً
دخلت ع الجوجل ريدر لقيت فوق ال 4000 بوست متقرأوش
:)))
ده عمو جوجل لو شاف وشي هيدبحني
:))
بس أول ما دخلت دخلت على العيلة البلوجريةاللي أولهم انتي و
Wish I were a Butterfly
:)
---------------
العجيب في الأمر اني بكتشف كل يوم إن السيناريو التعليمي في الحياة الفترة دي واحد ... بس سيناريو بيتعمل مسلسل وسيناريو بيتعمل فيلم وسيناريو بيتعمل مسرحية
وفيه ناس بيتعمل معاهم ال 3 سيناريوهات علشان الحياة تعلم فيهم أكتر وتدوس اكتر
وأهي كل ما بتدوس بنقوى اكتر
بيطمنّي حديث الرسول عليه الصلاة والسلام : أشد الناس بلاء الأنبياء فالذين يلونهم
ممكن فترة من الفترات زي ما كنت لسه بقول لموناليزا في اول تعليق
كنت استغرب اوي لو محستش ببلاء ... واقول اني اكيد شخص وحش علشان كده ربنا سايبني أتنعم ف الدنيا ... لكن مع شدة البلاء اللي هزني ... واللي مثله هزك ... اكيد الهزة دي اكتر حاجة بتخلينا نترمي بين ايدين ربنا
وطالما دي الحاجة اللي ترضي ربنا .. فاحنا بنفرح بقضاءه لينا اللي اكيد هيكون خير تحت أي ظروف
:)
أعاننا الله على أنفسنا وعلى الدنيا ويارب يكتبلنا السعادة والرضى أنا وانتي وجميع المسلمين يا بشمهندسة
:); October 13, 2010 at 2:50 AM
مشروع انسان said...: انت متعب :)

كلمات ادمعتنى

خصوصا كام حاجة كده بتاعة الناس الطيبين دول

فعلا الافلام العربية القديمة تقريبا انتهت بانتهاء زمانها والخير مش لازم ينتصر على الشر فى النهاية ومش لازم الشرير يطلب السماح

والحياة بتعلمنا وتربينا اكتر من اى حد بس طبعا المهم الاساس

اصلى فيه ناس بتربيهم الحياة برضه بس بطريقة تانية وبيستقبلوا التربية دى بطرق تانية

والقابض على دينه كالقابض على جمر مش بس فى الذنوب دى بس فيه ذنوب تانية ممكن تكون بسيطة عند ناس كتيرة وبتلاقيها فى الغربة برضه كتير وتكون اشد من الذنوب دى

وربنا يجمعكم على خير انت واخواتك والوالد اللى عرف يربيكم كويس :)

لما ارجع الامارات ان شاء الله لازم نتقابل :); October 13, 2010 at 8:17 PM
sakayar said...: امام الجيل
:)
ما أنا متعب آه
:))
الأفلام العربي القديمة خلتني ممنون جداً بسماع تعليقك
:)))
اللهم آمين يارب
تسلميلي يا محمد لتعليقك
وان شاء الله لما ترجع الامارات هكون أنا ف مصر وساعتها هقولك أنا لما أرجع الامارات نتقابل ان شاء الله
هههههه; October 14, 2010 at 11:12 AM
Anonymous said...: سلام عليكم اولا قبل اي كلام في اي كلام يرد بردوا علي اي كلام
وثانيا قبل بردوا اي كلام
يارب اشوف كل حاجة كويسه تجري وعليك وتبقي عارفة طريقها كويس
بخصوص ببقي الكلام اللي حضرتك كتبه
....................
انا معنديش كلام يتقال أكتر من اننا لازم نتعلم وعلشان نتعلم صح لازم يكون فيه الم سواء في مشهد الأسرة اللي اتفرقت في كل بلد
او موضوع الخمرا البايخ قوي دا....واللي بيوجع وبيشكل صدمه دماغيه وجربته في حاجه اخف شويه لناس ابعد من كدا بردوا شويه....ما علينا
المهم كل مشهد من المشاهد بيجهز شخصك المتواضع لشئ ما
صدقني
وابقي ساعتها تعالي قولي
اتمني ليك كل خير في الدنيا والاخره
لا تنساني من صالح دعائك يا أخي الكريم
رفيده; October 14, 2010 at 11:39 AM
sakayar said...: الخيـــــط الرفيـــــــع
غيبتك طوّلت أوي يا عمو حسين
:))
أولاً مبروك على الأخبار الحلوة اللي سمعتها
ويارب تكونوا ف سعادة وتوفيق وطاعة من ربنا دايماً
:)
ثانياً : كل الكلام اللي اتقال ده هرد عليه بجملة تانية
لازلنا بنتعلم ... ولازلنا بنبحث عن النور ف وسط الضلمة كعهدنا القديم
:)
ربنا يوفقك يا رفيدة لكل خير وصلاح ويقر عينيكي بكل اللي تتمنيه ف طاعة ربنا
لم أزل على العهد في الدعاء لكم جميعاً ... بس شكلكوا انتو اللي خالفتوا العهد بقى
:); October 14, 2010 at 11:43 AM
Anonymous said...: الله يبارك فيك يا طاغيةولو انها متأخره بس قلب الام بسرعة يسامح

بقلك النور اللي بتتكلم عنه دا غريب قوي لما بيبعد تجري وراه ولما بيجي بنشك ولما بيرحل بنزعل قوي

خلينا ندور عليه لحد ما نشوف هنوصل لايه
ربنا يكرمك وبدعيلك دائما انت وكل الناس
ربنا يكرمك يارب; October 14, 2010 at 12:10 PM
sakayar said...: والله يبقى العيب على الواد عاشق الروح
أنا بلغته يباركلكم بس هو اللي ندل بقى
:)
المهم اننا لسه عندنا الأمل واليقين اللي بيخلينا نجري وراه ونستناه لما يرحل
يارب اللهم آمين وإياكم أمنا الرؤوم
:); October 14, 2010 at 12:17 PM
Eman Eltaher said...: جميل اوى البوست دة
وكإنه بيعبر عن كلام ناس كتير بيدور جواهم
هو فعلا الدنيا تقريبا مش بتعلم غير اللى ممكن ييجى منهم من أصحاب الضمائر الحية
غير كدة بيتربوا بس بالآخرة
والله أعلى وأعلم
أولا احب اواسيك على فسخ الخطوبة وإن شاء الله ربنا هيعوضهالك ويعوضهالها
ثانيا الغربة كفيلة انها تعلم المغتربين حاجات كتير اوى
اولها الصبر
ولكن برضه كفيلة انها تلغبط الواحد وتهز فيه شعوره بكل شئ وتحسسه بحجم الوقت والسنين اللى ضاعت منه هدر
وانا جربتها بالسعودية مع أهلى المكان اللى لازم تحس فيه بالغربة حتى لو مع أهلك
وأهى الأيام بتعدى بسرعة والسنين بتفوت
وبيترسخ فينا كل يوم الدروس اللى بنتعلمها
ومحدش للأسف بيتعلم بالساهل :$
بس
الحكمة اننا نتعلم وننضج أفضل بكتير لو عشنا الدنيا بعمانا وجهلنا

:)دمت بألف خير سكايار
وربنا يديم قلمك وتعبيرك; October 15, 2010 at 7:54 PM
سندباد said...: وكانك بتتكلم عني
انا سافرت الكويت واتكويت وعرفت ان ابويا رباني صح في زمن غلط واني كان لازم اخد حقي من الصياعة عشان اعرف اجيب حقي
وسابني اغلي مخلوق في حياتي لاني طيب اوي او بالمعني الدارج عبيط اوي
بس زي ما قلت
هانعتبر اللي فات ده كله فيلم هابط او فيلم هندي
واعاننا الله
تحياتي لاسلوبك ومدونتك الراقية; October 15, 2010 at 8:36 PM
мαησηα said...: "أكلي بالشوكة والسكينة على سفرة بيتنا ... ممنعنيش أكون الشخص الشرس اللي يقطع بالسكينة حبل أي عروسة ماريونيت متعجبوش ... ويطلّع عينيها " بالشوكة اللي ف ايديه

ولا منعنى بردو اعمل زيك كده .. الاكل بالشوكة والسكينة مش معناه اننا بسكويت وعالم ماتعرفش تاخد حقها لان بردو ف ناس بياكلوا ع الطبلية ومابيعرفوش يجيبوا حقهم

" لسه مصمم إنهم ضحكوا علينا لما كانوا بيجيبوا في الافلام العربي زمان الخير منتصر في النهاية وان الراجل الشرير بيعترف بكل اخطاءه ويطلب
السماح "

وانا اؤيدك وبشدة المصيبة بقه ان فى ناس وممكن نكون منهم احيانا بنفتكر ف وقت الظلم انه هيجى يوم والخير ينتصر .. يمكن بنصبر روحنا لما نلاقينا مش عارفين ناخد حقنا :(

" علشان كده اتعلمت .... إن الطيبين مكانهم فوق ف السما مش موجودين ع الأرض "

علشان كده الموت بيختارهم نقاوة يا خالد
بيخطفهم من وسط احضانا لحسن نعلمهم الشر :(

" مفتقد للكثيرين ... وعندي رغبة في مسامحة الكثيرين لكنهم لا يعطوني الفرصة إلا أن أبغضهم أكثر "

للاسف صح جدا

"الدنيا بتربينا بما فيه الكفاية ... واظاهر كده الدنيا مبتربيش غير الطيبين ... لإن الآخرة بتربي ناس تانية "

رديت هناك وقولتلك ياخووفى نتربى دنيا واخرة :)

تسلم الايادى يا خالد; October 16, 2010 at 12:53 AM
Anonymous said...: بالتوفيق; October 16, 2010 at 12:59 AM
جمعاوى said...: ربنا يسامحك
!; October 18, 2010 at 1:32 PM
وحـــــــــــى القلم said...: ولسه بسمع أبويا يوم ما فوجئت بإن شريكي ف السكن بيشرب الخمر ... وإن غالب الأماكن لا تخلو من الدعارة وكان رده عليّا .... افتكر القابض على دينه
كالقابض على الجمر ... مش كل الدنيا ناس بتصحيك للفجر وتحفظوا قرآن سوا
تمام بس الفائز اللى يدور على حد يقبض معاه على الجمر عشان ميبقاش لوحده
قال تعالى
" و اصبر نفسك مع الذين يدعون ربهم بالغدوة و العشى يريدون وجهه و لا تعد عيناك عنهم"

طوبى للغرباء

********************************

ساعتها بس صدّقت أبويا لما قاللي من 10 سنين : احنا – الأسرة – الخمسة زي العُقد لو واحد فينا بعد ... العقد كله هيتوه عن بعضه

مظبووووط و كمان مؤلم جدا الغربه و الفراق من اقصى الآلام
**********************************

علشان كده اتعلمت .... إن الطيبين مكانهم فوق ف السما مش موجودين ع الأرض
اختلف معاك في الرأى لا موجودين بس زي اللؤلؤ
مش هتلاقيهم في كل مكان لأنهم كنز ثمين بس الإنسان لازم يصبر و يدعى ربنا و إن شاء الله لو هو طيب و مخلص في نيته لله ربنا هيرزقه بالطيبين
إنما إنهم مش موجودين دي نظره متشائمه جدا
***********************************
مكانش لازم تتعب نفسك وتربينا على فكرة ... الدنيا بتربينا بما فيه الكفاية ...
تختلف تربية الدنيا من شخص لآخر باختلاف بذور التربيه اللى غرسها الآباء لذلك فكون إن والدينا ربونا كويس دى نعمه تستحق الشكر و تستحق إنهم يلاقوا مننا البر
و اعتذر للإطاله; October 22, 2010 at 1:10 PM
نـــــور said...: مش هقول أى حاجة غير كلمة كان بيرددهالى حد بحترمه جدا
"استعن بالله ولن تعجز"

وقاك الله شر نفسك ومن حولك وأعانك على عصمها من كل سوء; October 30, 2010 at 11:41 PM
sakayar said...: Eman Eltaher
الاول أنا هحيي نفسي على البوست اللي خلاكي ترجعي للمدونات مرة تانية وتعلّقي
:)
ثانياً بقى وبعد نورتي وشرفتي والكلام اللي معروف من قبل ما يتقال
:)
أنا أيقنت ان المثل اللي بيقول : اللي مرباهوش أهله تربيه الأيام والليالي ... المثل ده طلع غلط جداً ... ده دول بس اللي بتزيد في تربيتهم الأيام والليالي ... الباقيين هما اللي بتربيهم الآخرة
:)
-------------
أتمنى من ربنا يكتبلنا الخير دايماً وإياكي يا إيمان هانم ... فيه حاجات في الدنيا مش بتتعوض غير في الآخرة
:)
كنت لسه هقولك شكلك جربتي الغربة لقيتك بتقولي السعودية
:)
فعلاً الغربة مش مجرد وجود في وسط أهل ... هي تركيبة كاملة على بعضها فقدت شيء من حياتك بتشعر تلقائياً بالغربة ... وبتبدأ مرحلة التعلم ... وزي ما قلتي .. أهم حاجة الواحد بيتعلمها الصبر
----------------

الحكمة اننا نتعلم وننضج أفضل بكتير لو عشنا الدنيا بعمانا وجهلنا

هي دي الخلاصة بجد
:)
ودمتي بألف خير وسعادة إيمان وعقبال ما نزور مدونتك قريب على تدوينة جديدة من طلقات مدفعك وكتاباتك القوية الساخرة
:); November 1, 2010 at 10:17 AM
sakayar said...: سندباد
الطيبة أوي أوي دليل النقاء يا سندباد مش دليل العبط
:)
بحس أحياناً ان حياة غالب البشر هي صورة طبق الأصل من بعضها مع اختلاف بعض المعالم على الطريق وكل واحد بتقابله المصاعب بالشكل اللي يقدر يتعلم منه
يارييييت نعتبره فيلم عبيط حتى ونقطع الشريط لكن للأسف فيه لقطات حلوة في الفيلم بتخلينا منقدرش نرمي الشريط من الشباك
:)
تحياتي ليك ولتعليقك الجميل ويارب أعاننا وإياكم يا سندباد
تشرفت بوجودك; November 1, 2010 at 10:20 AM
sakayar said...: мαησηα
أول زيارة ليكي يا منونة وبرضه بروفايلك هنا بصورة مبتسمة يارب دايماً البسمة تكون من نصيبك في الحياة
:)
لا الطبلية ولا السُفرة ولا الشوكة والسكينة همّا اللي بيكونوا شخصية الانسان يا منونة ... اللي بيكون شخصية الانسان هو صعوبة التجارب ... لذلك مش معنى انك انسانة رقيقة تبقي وقت الجد متقدريش تاخدي حقك أو انك انسانة عينيكي مبتدمعش انك قوية ومش بتحسي بشيء
:)
لأ فكرة النصر للخير دي احنا مش بنصبر نفسنا بيها ... ده وعد من ربنا ... لكن احنا في لحظات يائسة أو من شدة الاكتئاب بنحس إنه خلاص مفيش نصر ... فيه آية بحبها وبكررها كتير في الأوقات دي
أم حسبتم أن تدخلوا الجنة ولمّا يأتكم مثل الذين خلوا من قبلكم مستهم البأساء والضراء وزلزلوا حتى يقول الرسول والذين ءامنوا معه متى نصر الله ألا إن نصر الله قريب
تخيلي حتى الرسول اللي جاي من عند ربنا يكون بيوصل بيه الحال من شدة الضرر إنه يقول متى نصر الله؟ وحاسس ان النصر لسه بعيد
:(
لكن ربنا بيقول ألا إن نصر الله قريب
المشكلة اننا بنفكّر دايماً النصر هيحصل في الدنيا وبنستنى زي ما وعدونا في نهاية الفيلم ... لكن أحياناً نهاية الفيلم بتبقى في الآخرة مش في الدنيا وساعتها معناها عِظَم الثواب للي تعرض للظلم وللضرر وصبر ... وشدة العقاب للي ظلم أو أضر بغيره
---------------
فعلاً ... بنلاحظها دايماً ... اكتر الناس طيبة هما أول الناس موت
بجد سبحان الله
احنا اتربينا بما فيه الكفاية بقى كفاية كده علينا
--------------
يسلم مرورك وتعليقك يا منونة ويارب دايماً في خير وسعادة
:)
:)); November 1, 2010 at 10:29 AM
sakayar said...: يوميات شحات ، جمعاوى

نورتوني ويارب دايماً الحياة مديالكم الوش الحلو
:); November 1, 2010 at 10:31 AM
sakayar said...: وحـــــــــــى القلم
كنت لسه بتناقش مع أحد اصدقائي اللي ربنا رزقني بيه بعد فترة طويلة هنا في الغربة - كنت بدعي ربنا يرزقني بشاب صالح نعين بعض على طاعته لان للأسف الجو مليء بالشر - كنا بنتكلم هل احنا بنتغير لتغير المكان أم لافتقاد الصحبة الصالحة؟ وذكرلي حديث قاتل المائة نفس لمّا العالم قال له اذهب إلى أرض كذا وكذا فإن أهلها قوم صالحون
سبحان الله فعلاً ... أعاننا الله على الطاعة ورزقنا بالصحبة الصالحة اللي تعيننا على الخير دائماً أبداً
------------
رغم إني لم أصل للثلاثين بعد من العمر لكن طيلة ال 26 عام السابقة اكتشفت اننا في كل عام نفقد الكثيرين بالبُعد أو الغربة أو الموت ... سبحان الله الذي لا يترك عباده إلا إذا تركوه هم
اعتقد غربة الروح - عن الله - أقوى وأشد ألماً من أي غربة لذلك بحمد ربنا دايماً على فضله ونعمته دي ... لو عُرض عليّا غربة الجسد أم غربة الروح بالتأكيد هيكون الاختيار لغربة الجسد لانها أسهل بكتير من التانية
---------------
لم نختلف كثيراً وجودهم النادر أو مثل اللؤلؤ أو الجوهرة اللي من الصعب تلاقيها جعل مكانهم حتى وهما في وسطنا زي النجوم في السما تراهم وانت على الأرض ... لكن صعب توصل لمكانتهم
بس الأكيد انه من أعمالنا ربنا بيرزقنا بما نستحق من صفّى صُفّي له .. ومن كَدَرَ كُدّر عليه
إما تمحيصاً لعلو مكانة بلغناها .. أو ابتلاءاً لنصل لمكانة عالية لن نبلغها إلا بالصبر والنجاح في هذا الابتلاء
-----------------
دائماً بحمد ربنا إنه رزقني بأبي وأمي دول ... رغم حدوث الخلافات كثيراً في وجهات النظر لكن بالمقارنة بآباء وأمهات كثر بجد إن ربنا حاباني بأفضل اتنين على وجه الأرض
:)
الحمدلله على نعمه الكثيرة ويارب يرزقنا برهم كما يرضى
:)
-----------
اطالة مردودة يا فندم
:); November 1, 2010 at 10:46 AM
sakayar said...: نـــــــــــــور
ونعـم بالله
:)
اللهم آمين وإياكم نور هانم
رب يرزقنا الخير دايماً ويعيننا على ما دون ذلك
:); November 1, 2010 at 10:49 AM
Wish I were a Butterfly ... said...: :)

البوست دة جميل أوي أوي. من القلب أوي

بس مش عارفة ليه.. :) بعد ما خلصت قرائته لقيتني مش قادرة أقول أي حاجة!!هو كمان متعب! بس بجد كل كلامك صح جدا، و جميل أوي اللي اتعلمته اللي بتقول لنا عليه... ساعات بنبقى كلنا عارفينه أو على الأقل حتى حافظين الكلمات اللي بتتقال دي.. بس ساعة الجد نكتشف إننا مش كنا مركزين خالص

أنا مش من الناس اللي بقت تثق في الناس خالص بسهولة، فأكيد مش عمري هثق في حد مخبي إيده :). عجبني أوي المثال دة

مصدقة أوي موضوع إن لو حد سافر الدنيا كلها بتتلخبط مع الوقت. فراق بيبقى بطعم تاني و مع الوقت الواحد بيحس إن دة الطبيعي للأسف. ربنا يخليكوا لبعش

ساعات فعلا بقيت ألاقيني مش عارقة هو تربيتنا كدة كانت صح ولا كان لازم نتبهدل أكتر شوية كتير!! بابا لما جينا مصر و قررنا نستقر هنا بأة قلقان أوي.. ولسة لحد النهاردة بيكرر الجملة كل شوية...أصل انتو فراخ مزارع، مينفعش تدخلوا و تخربشوا في العالم دة

عمرك شفت حد يزعل من مامته و يقول لها انت ليه ربيتينا أوي كدة؟ :). أنا شفت

شكرا على البوست "الرائع". بس هو موده برده ممكن يقلق شوية. يارب تكون بخير وسعيد في حياتك

عارفة إني متأخرة جدا في تعليقي دة البوست بقاله شهر وزمان حضرتك نسيت البوست اساسا بس معلش اعذرني. على مافقت من الغيبوبة:). المشكلة إني مش عارفة أطلع منها خالص

Good luck, sir.; November 8, 2010 at 4:19 AM
Wish I were a Butterfly ... said...: Long time no see. :) Hope you're fine, sir.; December 20, 2010 at 2:41 AM
MarwaAshraf said...: فكرتني بالأغنية

يبكي ويضحك لا حزنا ولا فرحا

أنا لو قلت ليك إني عندي أمل حبقى بضحك عليك

المدونة حلوة أوي أوي أوي بجد

واحشني دخولي عليها كتييييييييير

صحيح بطل فرجة على أفلام قديمة واتفرج على أفلام رعب دايما الشر اللي بينتصر في الآخر ودلوقتي بس عرفت ليه :)

شكرا; December 28, 2010 at 11:14 PM
sakayar said...: Wish I were a Butterfly

بس مش عارفة ليه.. :) بعد ما خلصت قرائته لقيتني مش قادرة أقول أي حاجة!!هو كمان متعب

هههههههه نفس احساسي بعد ما خلصت قرايته
:D

-------------------
جميل أوي اللي اتعلمته اللي بتقول لنا عليه... ساعات بنبقى كلنا عارفينه أو على الأقل حتى حافظين الكلمات اللي بتتقال دي.. بس ساعة الجد نكتشف إننا مش كنا مركزين خالص

ودي فايدة كلامنا .. اننا بنفكّر بعض
:D

-----------------

أنا مش من الناس اللي بقت تثق في الناس خالص بسهولة، فأكيد مش عمري هثق في حد مخبي إيده :). عجبني أوي المثال دة

^ـ^

--------------
مصدقة أوي موضوع إن لو حد سافر الدنيا كلها بتتلخبط مع الوقت. فراق بيبقى بطعم تاني و مع الوقت الواحد بيحس إن دة الطبيعي للأسف. ربنا يخليكوا لبعش

ربنا يبارك فيكي يا فراشة ويجمع حواليكي كل اللي بتحبيهم

------------------
ساعات فعلا بقيت ألاقيني مش عارقة هو تربيتنا كدة كانت صح ولا كان لازم نتبهدل أكتر شوية كتير!! بابا لما جينا مصر و قررنا نستقر هنا بأة قلقان أوي.. ولسة لحد النهاردة بيكرر الجملة كل شوية...أصل انتو فراخ مزارع، مينفعش تدخلوا و تخربشوا في العالم دة
عمرك شفت حد يزعل من مامته و يقول لها انت ليه ربيتينا أوي كدة؟ :). أنا شفت

ما احنا بنقول أهو .. ربيتونا ليه بس؟
:D

---------------
شكرا على البوست "الرائع". بس هو موده برده ممكن يقلق شوية. يارب تكون بخير وسعيد في حياتك

عارفة إني متأخرة جدا في تعليقي دة البوست بقاله شهر وزمان حضرتك نسيت البوست اساسا بس معلش اعذرني. على مافقت من الغيبوبة:). المشكلة إني مش عارفة أطلع منها خالص

ربنا يكرمك دايماً يا فراشة ويكتبلك كل الخير ف حياتك ويقر عينيكي بكل الخير اللي تتمنيه
:D
أنا الحمدلله بخير والله والحياة بتجيب اللي عندها واحنا بنعاند برضه ونتنطط أدامها زي القرود
:); January 12, 2011 at 8:20 PM
sakayar said...: RAMA

ومعانا اتصال ونقول آلووو
:)

--------------
فكرتني بالأغنية

يبكي ويضحك لا حزنا ولا فرحا

أنا لو قلت ليك إني عندي أمل حبقى بضحك عليك

المدونة حلوة أوي أوي أوي بجد

واحشني دخولي عليها كتييييييييير

صحيح بطل فرجة على أفلام قديمة واتفرج على أفلام رعب دايما الشر اللي بينتصر في الآخر ودلوقتي بس عرفت ليه :)

شكرا

بقالك ما يزيد عن سنة تقريباً ممكن سنتين كمان مدخلتيش ولا شفت تعليقك فـ قهوتنا المتواضعة
شكلك رحتي لكافيتيريات نص البلد الغالية
:)

الأمل موجود طول ما ربنا موجود راما هانم
:)
المهم اليقين في ربنا والثقة في نفسنا
:)
تحياتي ليكي ويارب أحوالك كلها بخير
:); January 12, 2011 at 8:27 PM
MarwaAshraf said...: أنا كنت مريضة جدا يا بطل لفترة مش قليلة يمكن تقول ان 2011 كانت بداية التعافي والعودة للعمل

يارب يجعلنا عند حسن الظن بيييييييييه يارب

وقهوتك لا يعلى عليها لا تقلق حتى لو فيه كافتريات تانية هاجي هنا بردوا عند أحلى حياة
:)
rama; January 19, 2011 at 1:01 PM
MarwaAshraf said...: مبروووووووووووووووك لمصر يا بطل
زعلت اني مش لاقيت حاجة بتحكي عن مصر
مستنية قهوتك تحكي عن مصر .. مصر الحرة
مروة; February 12, 2011 at 12:50 AM

واصبر نفسك

اللهم يا صاحبي عند شدتي
يا مؤنسي في وحدتي
يا حافظي في غربتي
ياوليي في نعمتي
يا كاشف كربتي
يا سامع دعوتي
يا راحم عبرتي
يا مقيل عثرتي
يا إلهي الحقيق
ويا ركني الوثيق
يا جاري اللصيق
ومولاي الشفيق
يارب البيت العتيق
أخرجني والمسلمين ومن سألنا الدعاء وسألناه الدعاء من حِلق الضيق إلى سعة الطريق
بفرج من عندك قريب وثيق
واكشف عنا كل شدة وضيق
واكفنا من السوء والأذى ما نطيق وما لا نطيق
اللهم إن لي أحبة في كل درب وصحبة
فاغفر لهم وأعنهم ويسر لهم أمر رشدٍ
يعبدوك لا يغفلون عن عبادتك ويرضون بما قسمته ويفرحون بقضاءك
اللهم لم تخذلني في نفسي فلا تخذلني فيهم أبداً
وصلى اللهم على نبينا محمد وعلى آله وصحبه وسلم