السلااااااام عليكم
اتفضلـوا شاي بحليييييب
محدش يستنى الجاتوه علشان أنا مفلس وآخر 10 ايام ف الشهر ببقى الزاهد العابد الورع التقي النقي الشقي باااااااااااااااااااس إيه اللوك لوك ده يا لهوووووي
زي ما انتو شايفين وملاحظين المدونة مش باين عليها أي مظاهر احتفال أو أي حاجة .... بس علشان العين بس انتو عارفين العين قرفت الشجر ... حرقت المجر .... سرقت الغجر ... يووووه العين فلقت الحجر يا جماعة ركزوا مش وقته
بمناسبـة إن مدونتي النونو الكوانونو كبرت وبقى عندها سنتين فأنا النهاردة وبفخر وبكل عظمة ومن موقعي المفخم المحدد باللا حدود في العولمة الميتافيزيقية الحلزونية اللامركزية إتسترا إتسترا إتسترا ..... فإني أعلنها صريييحة
بس خلاص
ومش هقعد أرغي وأقول كتبت السنة دي 21 بوست بس بما يعني نزول النشاط التدويني بنسبة أقل أكتر من 50 في المية من السنة الأولى .... ومش هقعد أقول كمان البوستات كانت كام بوست شعر وكام بوست مقال وووو مش وقته خالص
لكن بيواكب الاسبوع ده كمان معاد خروجي من مصر وبداية الغربة والكفااااح .... صاااااعقة .... صااااعقة
وبالمناسبة اللطيفة دي .... فأنا بشكر كل مدون أو مدونة زاروني أو زرتهم وكانت بيننا كل علاقة احترام ومودة وأخوة نقية وصافية وناعمة وطرية وكلها حنية
وعلى رأس قائمة المدونين أحب أشكر كل اللي شافوني ورأوني وصلوا على النبي ... واللي شافوني ومصلوش ع النبي لا صلى الله عليهم ولا رحم أهاليهم هه ... نياهاهاهاها ... لا حول ولا قوة إلا بالله الواد كان بعقله وربنا
وبشكررررر شكر خاص عريس الليلة وكل ليلة المدون الجميل أستاذ تامر صاحب مدونة
أكتب بالرصاص ... المدون الجميل اللي قابلته في أبوظبي واستضافني في بيته وحسسني بإننا فعلاً عيلة واحدة ... وقابلت أولاده أجمل كتاكيت وعفاريت ف الدنيا قابلتهم ... يارب يبارك فيهم
ومن هذا المنطلق هحود بقى على الغربة وأول سنة غربة تعدي عليا .... طبعاً أنا كان كبيري أخرج للمدرسة أو الكلية أو الشغل وأرجع بيتنا وأنا ف مصر
لا جيش دخلت ... ولا مدينة جامعية زرت ... ولا أعرف مكان غير بيتنا اللي باكل فيه بالشوكة والسكينة والكل يبصللي نظرات خبيثة مليئة بعلامات التعجب ويقولوا لبعض حد فيكم يعرف الأخ؟؟؟
* سنة غربة يعني سنين خبرة
* سنة غربة .. يعني سلبيات وايجابيات .... يعني سعادة وألم .... يعني مشاعر كتير جداً ممكن الواحد يحسها ويشوفها ويتعلمها
* لما قالوا عني إني طيب وفيه جوايا كل صفات الطيبة ..... فالحمد لله اكتسبت في الغربة صفة جديدة وهي صفة الشر والشراسة .... لكن تكتسبها غير ما تتعامل بيها ... تكتسبها علشان وقت ما تتعامل ف وقت مع حد مينفعش تتعامل معاه غير بكده تقدر وقتها تستعملها
* وزي ما اتعلمت في مصر البسمة والضحكة الصافية واتعلمت أحط قناع على وشي وقت الحزن علشان أفضل أعطي للناس أمل إن الحياة جميلة وسعيدة .... اتعلمت هنا ما اشتكيش لحد .... ومسمحش لحد يعملني شماعة لأخطاءه أو يلعب معايا دور الضحية ... فاتعلمت أكشر وأخلي وشي خشب علشان محدش يشوفني ورقة ضعيفة ويقطعني
* استفدت من شغلي ف مصر ف نفس الوقت إنك متخسرش علاقة مع حد ... واستفدت إنك تحسس اللي أدامك إنك بايعله نفسك ... ومن غير ما تكون منافق .... استخدمت ده هنا ... وفادني كتييير جداً في تحسين علاقتي مع الناس اللي شافوني متحفظ في علاقاتي
* شفت إزاي انك ممكن تتعب وترقد ف السرير ومحدش يحس بيك ولا يعرف عنك أي حاجة وتزيد الأحداث والصدمات وتفضل مستحمل علشان فيه ناس حواليك لو شافوك وقعت مش هيقدروا يقفوا ... حتى لو صعبت عليك نفسك ومقدرتش تستحمل ... بس أكيد لكل واحد حضن بيعرف يرتاح فيه وسط كل الصدمات دي بيحس بيك من غير ما تشتكي ... واللي مالوش حضن هيلاقي ربنا أجمل من أي حاجة ف الدنيا
* اتعلمت إزاي تبقى بجد شخص مسئول عن نفسك وتبقى مسئول عن تصرفاتك ومسئول عن غيرك ف وسط زحمة المسئوليات
* اتعلمت إزاي أكون طاغية في الحق أكتر .... واتعلمت إني لو سكتت عن حقي ف مرة يبقى مش هقدر أطالب بحقي تاني ف حاجة ... لإن الانطباعات الأولى تدووووم
* زاد اقتناعي بإني لا أثق في مخلوق لمجرد مظهره أو طريقة كلامه
* اتعلمت إن الحياة لما بتعطي حاجة .... بتاخد حاجات كتييير أوي ادامها .... بس الذكي اللي يخلي الحاجة دي تعوضه عن كل اللي اتاخد
* اتعلمت معنى إنك تكون بتعمل حاجة بحب .... وإنك تعمل نفس الحاجة غصب عنك
* اتعلمت إني لما أحلم... مبخلش على نفسي في الحلم .... وأخلى لحلمي رجلين علشان يمشي ويتحرك ويتحقق
* اتعلمت إن مش كل اللي الناس بتقوله هيبقى علشانك أو لصالحك .... وإن فيه ناس بيعملولك ألف خير علشان يوقعوك ف واحد شر على حساب المعلم وزود الشطة
* اتعلمت معنى إنك متتعشمش ف حد حتى لو كان أقرب المقربين .... ف نفس الوقت اللي اتعلمت فيه إنك تعطي 2000 عذر لأي حد
* اتعلمت إني أوفر طاقتي ف التفكير الايجابي ... بدل ما أستهلك طاقتي كلها ف تعب أعصاب من فلان غلط فيا وفلان زعلني وفلان غبي وابن تييييييييييت
* اتعلمت إن مش كل المصريين وحشين ف الغربة ... ف نفس الوقت اللي اتعلمت فيه انك متطلبش من حد أي خدمة علشان هيملك رقابتك بيها ... في الغالب يعني
* اتعلمت إني معممش الحكم على حد
* عرفـت معنى إنك تعرف ناس أغراب عنك ويعاملوك كإنهم اتولدوا وعاشوا معاك ... وأد إيه الود والحب بين الناس من أجمل الحاجات اللي الواحد بيحتاجلها
* شفت إزاي ممكن تفتح حضنك لحد تلاقيه جاب سكينة ورشقها جواك
* اتعلمت إنه مش كل اللي بيقول حاجة أو يعيب عليك ف حاجة مبيعملش نفس الحاجة وأقسى وأغبى منها
* اتعلمت ان الناس مبتبصش لعيوبها لكن بتستلذ في إنها تحلل كل أخطاء وحركات غيرها وتستلذ لما تطلع أي حد حتى لو ملائكي ... يطلعوه أحقر من إنه يكون انسان
* اتعلمت ف إن فيه ناس لسان من غير عقل وفيه ناس عقل من غير حركة وفيه ناس لسانهم يستحق القطع وعقلهم يستاهل التفجير
* واتعلمت إن اللحظة اللي تعدي عليا من غير استفادة فأنا يا إما ميت أو لسه متخلقتش
* اتعلمت إنك لو اترددت ف قرار مرة هتخسر بعديه ألف مرة
* اتعلمت إن السرعة مطلوبة لكن وهي متحاوطة بالفكر والطريقة الصح وأهم حاجة التوكل على الله
* اتعلمـت إن اللي مالك رزقك ويستحق الثقة واليقين ف كل شيء متفرد بكل ده هو ربنا سبحانه وتعالى
* اتعلمـت إن مفيش حاجة صعبة مع ربنا ... ولما تطلب ... خليك طماع ومتخفش ... كل اللي عاوزه هيتحقق
* اتعلمـت إن القرب من ربنا مش لازمه مكان معين ولا زمان
* شفت ناس عايشة ببساطة جداً وقريبين من ربنا بدرجة جميلة أوووي .... ومنعهمش الغنا أو المال من إنهم يكونوا قريبين من ربنا مع اقتناعهم بقول ربنا ولا تنسى نصيبك من الدنيا
* شفت ناس هنا مش آلات وبس زي ما كانت فكرتي عن كل اللي عايشين بره ف الخليج
* شفت أصغر مؤلف قصص انجليزية واتصاحبنا بس لانشغاله ف الدراسة مش بعرف أشوفه أو أتواصل معاه
* شفت حياة إيمانية وروح ايمانية جميلة جداً لما تدخل المسجد وتلاقي المسجد مليان في صلاة الفجر والعصر والعشا ... مع العلم إن المساجد هنا مساحتها بالعرض تعمل مسجدين ف مصر هههه
* شفت ملاهي ليلية وغواني بيعرضوا نفسهم بخمسين درهم .... وشفت غانية بترفض 200 درهم علشان اللي بيعرض عليها باكستاني .... والهانم صنع في الصين
* عرفـت هنا بجد معنى حديث الرسول والقابض على دينه كالقابض على الجمر
* عرفـت هنا إزاي إن المصريين في بلدنا غلابة أووي ومحتاجين لشاحن نوكيا علشان يقدروا يتحركوا بعزيمة في الحياة
* صدقـت صديقي لما قاللي تقدر تعمل اللي عاوزه هنا ف مصر بدل ما تسافر بس محتاج صبر وعزيمة ومجهود .... بس أنا قلت أوفر صحتي وأختصر الطرق
* شفت آباء هنا بيتعبوا أد إيه وبيتألموا ف كل لحظة ... وأولادهم ف بلادهم ولا حاسين بيهم وكل اللي عاوزينه فلوس وطلبات ويلا يا بابا انزل ومتنساش اللي قلنالك عليه
* حسيت أد إيه لما العاطفة بتتنزع من البيت بيبقى أفراده عبارة عن موظفين وكل شخص له مهمة والأكثر من ذلك إن علاقتهم تبقى مبنية على المصلحة
* عرفـت إن الغربة مش بالبُعد عن البلد .... ممكن يكون كل ناسك حواليك ... لكن برضه تحس إنك لواحدك
* عرفـت إن الحب هو مفتاح النجاح ف الحياة
* زاد يقيني إن الحياة والدين معنى لشيء واحد إذا كان آخره عمل وإيمان وتوكل ويقين وعزيمة
* زادت ثقتي في نفسي وحبي ليا أكتر بكتير من زمان
* زاد التحدي عندي إني أفضل مبتسم وإن راحت البسمة كفاية رسالة جميلة من أو إلى وألاقيني مبتسم ونفسي أحضن الدنيا كلها
* زاد حبي للقب الطاغيـة السكـايـار
* زاد الكلام في البوست ده أوي وكفاية كده مع إني ممكن مش أخلص بس كفاية علشان وجعتو دماغي يا رغايين
أشوفني على خير
سلام
