البارا

البارا ... لفظة انجليزية تبدأ في بداية الكلمة ... معناها " بجانب" ولها كلمات مشهورة جدا في اللغة ... زي مثلا
paratrooper .. اللي هوه المنطاد.
وفيه معنى تاني للبارا تروبر ... اللي هوه parachute وده اسم المنطاد نفسه أو الباراشوت

فيه كمان parachutic اللي هيه الصفة يعنى برشت برشتة ...هيه دي البرشتة

فيه أخيرا كلمة parachutist وده الشخص اللي بيبرشت ... يعني بييجي ينط زي الباراشوت

الكلام النهاردة عن الشخص ده ... اللي هوه الباراشوت

الباراشوت يا حضرات المستشارين ... شخص تقيل الدم ... وعمره ما بيتلم ... شخص من الممقوتين عند النفس ... أو من الناس اللي مش دايما بنطيقهم فجأة تلاقيه مقابلك ف الشارع ... أو ينطلك ع البيت أو ف التليفون

المشكلة مش ف إنه يقابلك ف الشارع .... ده عادي ... كلنا بنقابل ناس لا تطاق ف الشارع .... لكن المشكلة إنه يصمم إن دي أسعد لحظة ف حياته علشان شافك وبالتالي مش هيسيبك ... بس كمان 9 أيام لما يحس هوه بملل بيسيبك ربع ساعة يقضي مصالحه ويرجع تاني

المشكلة الأكبر ... إنه ينطلك ع البيت وانت مش طايق تشوف أعز اصحابك .... بتبقى حاجة خنيقة خنيقة خنيقة

أنا اتعرضت للموقف ده مرة أيام الكلية ... أنا أساسا ما كنتش بدخل أصحابي البيت لإني بعتبره محرم لا يجوز لأحد دخوله .ونط لي مرتين ف البيت لكن قفلته ف التالتة وانا ف قلب الكلية ... أصله كان غبي حبتين ... لكن بمرور الوقت .... بدأ ت أدخل بعض أصدقائي عندي البيت ... زي عاشق وحلاوة مثلا

الفكرة إن فيه بعض الناس مش عندها حساسة ... تجيبهم كده تجيلهم كده هما كده ... يقول ف عقل باله رخم رخم وماله .... المهم مصلحتي أقضيها

أنا شوية بدأت أفتكر المواضيع دي ... فقلت هي فكرة بوستي الجديد ... أنا مش عارف الناس ممكن تتعامل إزاي مع الباراشوتات .... خصوصا إن معظمنا ناس محترمين وولاد ناس مش بنعرف نتعامل مع الأشكال دي ونقول ....على رأي شاعرنا الكبير .... هأو

تعمل إيه لو صحيت م النووم ف أي وقت ولقيت ناطتلك على بلكونة بيتكم واحد بالباراشوت كده؟؟؟

فترة راحة

بعد إذنكم

محتاج

فترة راحة

أو سميها

عزلة

هكتفي فيها

بالقراية وبس

هتابعكم

لعل وعشم

شخصيات كتير في حياتنا ... بنقابلهم ويقابلونا ... لكن مش كل الناس أكيد تعرفهم ... ومش كل الناس هتفرق معاك إنهم يعرفوك ...لكن لما يحصل ويتكرر الموقف من كذا شخص ما يفرقوش معاك ويبقى على نفس الموضوع ... يبقى لازم هتفرق معاك... وإلا هتبقى شخص بارد ... زيي يعني
أنا مثلا ..من حوالي سنتين .. وانا طلع ولد ف حياتي اسمه عمرو... الولد ده يشبهني لدرجة فظيعة ... ف المشية .. ف الضحكة ... ف الحركات ...حتى ف الشكل... تخيلوا بقى إن حتى وهوه بدقن ... نفس شكلي
أنا أذكر مرة ... خالي ... الله يرحمه ... قابله ف المسجد يوم وسلم عليه وخده بالحضن ... وإزيك يا سكايار وعامل إيه ... وانت فين ابقى خلينا نشوفك... و هُب سلام...وبعد ما مشي ... قال الجدع ده ما ادانيش انطباع سكايار...
اتكرر الموقف ده معايا أنا بقى من يوم ما عرفت لحد النهاردة ... يعني سنتين ... وانا بمشي ف الشارع ألاقي شباب كتير ينادوني ...عمورة إزيك ...عمورة بتعدي ومتسلمش...عمورة ...إيه يا عم انت اغتنيت وبتنفض؟؟؟ وهكذا
نزلت بلد تانية ... لقيتني بتنده باسم جديد ... مرة شريف ... ومرة مصطفى ... والكل بيقف يسلم علي ويكلمني على إني الشخص اللي ف دماغه...آخر موقف ... وأنا مسافر من المنصورة .. وانا مروح ... رايح أركب البيجو ...لقيت واحد "دفعة" قاعد ف الكرسي الوسطاني... أنا بحب أركب ف الكرسي اللي ورا ... قاعدة ملوكي شوية...وبدأ الحوار
لو سمحت أعدي ورا... والباشا باصصلي وبيبتسم ... رجعت كررتها تاني وانا بضحك ... طيب أعدي الأول ... وفجأة لقيت اللي نزل ...أخدني بالحضن ...وخد بوستين كده ع الماشي ...ولو أهلي عرفوا ممكن يطخوني بالنبلة...وأخيرا اتكلم ..قال.. طيب نعدي احنا الاتنين ورا
بصراحة أنا قلت ممكن يكون قريبي وأنا مش عارفه وهوه عارفني... ممكن يكون معرفة ... بس طالما عارفني عيش معاه الليلة لحد ما تعرف هوه مين...
الدفعة: ازيك عامل إيه رديت عليه : الحمد لله أخبارك انت
الدفعة : أهو بقيت ف الجيش.. انت هنا ف المنصورة؟؟ رديت عليه : آه بشتغل هنا
الدفعة: فين؟ رديت طبعا : ف المستشفى
قال: ف المستشفى نفسها..رديت : لأ الشارع
سكت شوية ... بص الناحية التانية ... وتقريبا اكتشف أمري
الدفعة: هوه انت ...محمد
رديت ... وانا بهرش ف راسي: لأ سكايار
الدفعة : أصلك شكل واحد أعرفه أوي ..بس بقالي سنتين ما شوفتوش
أنا (ابتسامة عريضة) وسكوت
والمفروض بقى يتلم ويسكت ... لكن رجع تاني...وانت بتشتغل حكومي بقى ولا إيه ؟؟
فرديت : لأ شغل خاص
بصراحة الحوار طويل جدا ... لكن صعب يتكتب
المهم ... تعمل إيه لو صحيت م النووم لقيت كل ما تقابل حد يعاملك على إنك شخص تاني هوه يعرفه؟؟؟؟؟
سامحوني على التطويل

نهاية

صحيت م النووم لقيت نفسي عايز أرقص

لكن مالقيتش حاجة لوسطي يتحزم

صحيت م النووم لقيت نفسي عايز أخرس

لكن مالقيتش ماسك لوشي يتلتم

صحيت م النووم لقيت الشعب عايز صوت

صحيت م النووم وخايف م النهار ليفوت

صحيت م النووم وبسأل هوه امتى هموت

صحيت م النووم لقيت الشمعة بتنور .. ونور الشمعة جاي م النار

صحيت م النووم لقيت الشمس بتدور وبتنادي على المحتار

صحيت م النووم لقيت الدمع ع الخدين وكله بيسأل الغفار

صحيت م النووم ... وما لقيتنيش

صحيت م النووم... ماحستنيش

صحيت م النووم ..باينني مفيش

وباين إني م الأول .. دخلت أنام .. وخدني النووم ..ومصحتشي

وواضح إن قلمي ف درجي وكتابتي ماطلعتشي

وفيه صوري وفيها البسمة مرسومة بأحلى عيون

وفيه زحمة وفيه قرآن وكله بيبكي بس سكون

وده سريري وده المكتب ودي مرايتي

وده جسمي على سريري ودي نهايتي

مفيش ماسكات مفيش حتى أعود ثانية

مفيش حكايات وكله بيلعن الدنيا

وكان لي صحاب ..خلاص فركش

وكان لي حبيب ... نسي وطنش

وفيه أحلام ... ماحصلتشي

وفيه احساس... وماوصلشي

وفيه الخاين الغشاش

وفيه بايع حياته بلاش

وفيه قلبي بيتحسر


وفيه عضمي بيتكسر

وفيه ملكين وفيه سؤالات

مفيش فايدة ..مفيش اجابات

بقول أهرب .. مفيش مهرب

خلاص ف القبر متغرب

ياريتني تراب.. يا دنيا سراب

سابوني الأهل والأحباب

دفين لمؤامرةعملاها غرايزنا

قتيل ف مغامرة شكِلها هوى نفوسنا

يا ليل رجعني من تاني

أعيش وأقتل ف أحزاني

أشيل الجرح من قلبي

وأضحك ع اللي بكاني
............................

وفجأة وداني سمعت صوت

دي أمي وجاية بتنادي

معادك الحقه ده هيفوت

قوم اذكر ربنا الهادي

وسامع همس كل الناس

لكني خلاص ...مفيش احساس

وقامت شمسنا تنادي عشان يرجعلها المحتار

لكنه خلاص ...مهوش موجود

هيه بقت كده؟؟؟

مش هعمل زي أشرف اخف دم وأقول دور عن البوست المحذوف ... لإني عارف محدش هيلاقيه ... وأنا أصلا ..آه أصلا مبحبش أتعب اللي حواليا...لكن أرجو من سعيد الحظ اللي قرأ البوست إنه ينسى اللي اتكتب فيه ...طبعا مفيش حد فاهم حاجة؟؟؟
انا هقولكم
الموضوع وما فيه إني كتبت بوست جديد ...قعد البوست ع النت لمدة نص ساعة ...وبعدها اختفى ...إيه سر الاختفاء؟؟؟ هل تمت سرقته؟؟؟من المسئول عن اختفاء البوست ... وبتتهم مين ف الجريمة دي ؟؟؟ أنا مش بتهم حد...أنا نفسي اللي لاغيت البوست ...أصله بصراحة كان قمة ف الاكتئاب ...وكل شوية أدخل اعمل تعديل ...وأزوده كآبة ... لحد ما حسيت إن الضحكة اللي مرسومة على وشي الحقيقي ...انتهت وطلبت ماسك من بتوع الضحكات ...فقلت لأ ..خليني زي ما انا من غير ماسكات ...اقفل البوستات ..وافتح الآلوهات ...أصلي كمان كنت قافل موبايلي..... صاحبنا ....... قالب وشه عليا من آخر كلام كان بينه وبيني...بالمناسبة البوست اللي كنت كاتبه ولغيته كنت كاتب فيه إنه هيبقى آخر بوست مني ع البلوج ...لكن ما قدرتش
آسف طولت عليكم ...وكمان كنت تقيل الدم النهاردة ...بقولكوا إيه ..محدش يقرا البوست ده وخلاص

صحيت م النوووم

صحيت م النووم لقيت نفسي عايز أفرح

صحيت م النووم بقول الوردة بتفتح

صحيت م النووم وديك الفجر بيصيّح

صحيت م النووم وشمس الصبح هتصبّح

ولما أصحى ف قلبي أكيد يزيد مطرح

مسكت المشط وبسّرح

وبحلم إني أيوه صحيت

قالتلي مرايتي ليه تفرح

روح انزل بص تحت البيت

لو انت نزلت للشارع.... تلاقي الصدق بقى مسرح

لو انت قابلتني امبارح .. . لشفت الكل بيجرّح

لو انت آمنت لي وجيتني ...أكيد قلبك هيتشرّح
********
*******
وجيت نازل على السلم ...سمعت الباب بيتكلم

يا مجنون انت رايح فين؟

هتنزل من غير السكين؟

فقلت وليه أنا احتاجها؟

ف جابها الباب قال امسكها

لو انت نزلت للشارع تلاقي الكل بيدبّح

لو انت نزلت من غيرها ...هتغرق دم فيه تسبح

فقلت ده إيه حصل للناس

ورّد الباب ... مات الاحساس
رجعت لــ أوضتي ودموعي على خدّي

رجعت بنادي من تاني هعيش حيرتي

ونط سريري م الفرحة

وشفت مخدتي بطرحة

لكن مش نايم أنا صاحي

وهحلم ...لو هعيش اليوم .. لازم افرح

رُفع الستار

صبح الصباح فتاح يا عليم ...كوكوككوكووووووك

يا صباح اللي بتصوصو ع الغصون

إيه ده انت نزلت من تحت البطانية وخارج كده؟؟؟

عيب عليك يا رااااجل

بص الأول لنفسك ف المرايا فيه حد يطلع كده يقابل الناس ع الصبح وهوه مكلضم؟؟؟

خلي بالك ... "رُفع الستار" انت طالع الصالة يا حلو

والصالة فيها كمين واقف ...بابا .. ماما .. أختك .. أخوك

وكلهم لو شافوك صاحي الصبح بالوش العكر ده ..هيبقى فيه حاجة م الاتنين

يا إما هيتضايقوا زي ما انت متضايق ... يا إما هيبدأوا يوقفوك

ثواني .. الرخص حضرتك

 ويا سلام لو طلعت العربية مش بتاعتك

أيوة كل ده ف الصالة

أصل احنا البيت عندنا واسع

فبخرج بالعربية بتاعتي اللي أنا مجرشها تحت السرير

 معرفش انتو بيتكو واسع زي البيت عندي 

ولا ساكنين في مدافن العيلة ؟؟

المهم أول ما هتطلع الصالة

وتقابل الشعب اللي عايش معاك ف البيت

وانت بالمنظر الطبيعي لأي مواطن شاب ف سننا ده 

هتلاقي الكل بدأ يجري من أدامك

أو هتلاقي حد انحنى عليك وبدأ يسأل

مالك يا حبيبي ؟؟ مالك يا قلبي؟؟؟ هوه فيه حاجة مضايقاك ؟؟

لو كنت ولد : هوه البنت اللي انت كنت بتحبها قابلتك امبارح ولا إيه ؟؟؟

ولو كنت بنت : هوه الواد ابن الــ... قابلك امبارح ولا حصل ما بينكوا حاجة؟؟؟

ويا سلام لو عندك أخت كبيرة أو حتى صغيرة مش كده يا بطوطة؟ :)

تلاقيها جايا داخلة وراك الأوضة ..مالك يالولو؟؟ مش هتقوللي ؟؟

مش أنا أختك حبيبة قلبك ؟؟؟

ساعتها بس بتحس إنك عايز تولع ف العالم باللي فيه

هوه أنا لازم أصحى عامل فيها "سَكِّير نكت"

ولا هوه الواحد ما يعرفش يعيش حياته من غير سين وجيم؟؟؟

ولا هوه لازم علشان أنا عايز أعيش شوية جد يبقى فيه حاجة مضايقاني؟؟؟

ممكن أكون زعلان فعلا علشان حد صاحبي واقع ف مشكلة وانا عايزه يخرج منها 

ممكن اكون أنا ف مشكلة وعايز أعتمد على نفسي ف إني أحلها

ممكن يكون مفيش حاجة من دي خالص لكن صاحي دماغي مصدعة

أو مانمتش كويس

أو ورايا حاجات كتير وبفكر إزاي هخلص الحاجات دي كلها ومش عايز إزعاج

لكن بعد كل ده بنوصل لحل واحد وهو "احذر .. رفع الستار" وبدأ التمثيل

تبدأ يومك أول ما تشيل الغطا من على وشك بابتسامة عريضة

 إن ماكانتش ضحكة رقيعة

علشان الشعب كله يقوول إنك أسعد بني آدم ف الدنيا

وده طبعا له أدواته

زي مثلا إنك تفتكر لقطة من فيلم لـ جيم كاري

 أو مشهد من العيال كبرت

وبعدين تطلع الصالة وانت بتغني أحدث أغنية نزلت "السوء"

حتى لو ماكنتش حافظها أو سمعتها

 إلا إذا كنت شاب ملتحي ..زيي

 فممكن تغنيلك نشيدين من بتوع الواد مشاري طلع البدر دوول أو حاجة من بتوع الأطفال اللي كلنا اتربينا عليهم زي طلع الفجر

وبكده يبقى أخدت لقب ..أسعد إنسان ف العالم

هتقوللي طب ومشاعري .. وأحاسيسي ..أعمل فيها إيه؟؟؟

هقولك كده أحسن ... ولا كل ما حد يقابلك يحس بإنك أنكد واحد ف الحياة

وأكيد هتلاقي هنا اللي يساعدك .. وهنا اللي يساعدك

 لكن الأجمل إنك تعيشها مع نفسك

لحد ما تحس إنت بنفسك إنك محتاج لحد يسمعك

ممكن ساعتها تختار إنت الشخص اللي يسمعك

 مش تبقى ماشي تحس إن محطة مصر كلها جاية تحلللك مشكلة هي أساسًا مش موجودة

وكل واحد بقى يفتي .. ده كذا اللي مزعله .. لأ ده كذا

ويا سلام ممكن توصل لإن 2 من اصحابك يتشاكلوا ع السبب اللي مزعلك ويتخاصموا...

ما تنساش ... أول ما تصحى من النوووم

الماسك - القناع يعني - جنب المخدة

حطه على وشك قبل ما تطلع الصالة

وافتكر ... رُفع الستار

يوم جديد

صديقي صديق الصباح ...أهلا باللقاء لقاء تتجدد فيه الضحكات ... تتجدد فيه القفشات من اذاعة مدرسة الثانوية بنين كان معكم ....ح ..ش... والسلام عليكم ورحمة الله
أنا النهاردة صاحي عندي مزاج أنزل المدرسة ... صحيح خلصت تعليم ... لكن نفسي أروح المدرسة ... قال لي واحد رخم زي صاحبي حلاوة كده ... طب ما كنت تشتغل مدرس ...لكن أنا عاجبني الجو اللي أنا فيه والناس اللي بتعامل معاهم...فرد مرة تانية يبقى ما تقرفناش بأفكارك... لحظات سكوت... وبدأت أحلم
يووووه ... انت تاني هترجع تحلم تاني؟؟؟؟ قلت طيب نصحى من النووووم ... صحيت من النوووووم ... يلا انتوا اللي جيبتوه لنفسكوا ... مين طفى النور .. آه .. آآآآآه ... ده دراع حلاوة .... لا والله ده العاشق اللي ضرب ...بتحلف كدب كمان؟؟؟؟ انت هتصيع يا عاشق الواد اتعور.. ما علينا ... عارف لما بتصحى من النوم الصبح ....أكيد بتفرق من إنك تصحى من النوووم بالليل....آه والله
لما بتصحى الصبح بتحس إن فيه حاجة وراك ... يعني وراك مدرسة أو درس أو كلية أو شغل أو مشاوير هتقضيها للبيت ...لكن لما بتصحى بالليل .. هتلاقي فيه أكل ف المطبخ أو التلاجة ... أو هتلاقي التليفزيون فيه فيلم أو برنامج ... أو هتلاقي صوت الديكة لو انت جنبك حد عنده فراخ أو محل دواجن حتى ... فهتحس بقرب الفجر فهتدخل تصلي أو تقرا قرآن ....أو هتلاقي فيه جو ممل وهتطلع البلكونة - ده طبعًا لو ف الصيف ... لكن ممكن يبقى عندك مذاكرة ... لا مؤاخذة أنا مبلقحش الكلام على حد ...بس المهم لما تصحى من النووووم تحب تكون الصبح ولا بالليل ؟؟؟ وتحب تعمل إييييه؟؟؟؟

الاعتراف والعتاب

في معظم علاقاتنا مع الناس أكيد أكيد بيتعرض كل واحد مننا للحظة بيحس فيها إنه مخنوق من فلان ... أو متضايق منه ف حاجة معينة ....أو حاسس إنه غلط فيه أو زعله....المشكلة بتكبر معانا لما بنبدأ نشغل مخنا ...بس بطريقة غلط ؛ بمعنى إني بدل ما أشغل مخي علشان أعذر اللي أدامي ... ببدأ أشغل مخي علشان افتكر له التكات القديمة اللي عملها معايا ... أو أبدأ ابني آراء من خلال مواقف متفرقة علشان أخلي الشخص اللي أدامي ده جاني وظالم وأنا الضحية الوحيدة ف البشر .... أكيد معظمنا اتعرض للموقف ده .. بس الجميل إنك لما تتعرض للموقف ده ...لما تحس بزعل أو تحس إنك متغير من ناحية حد تدور على حل تاني بخلاف إنك تحمله هوه الغلط ...مش لازم تدور على أعذار لأنك كده خليته فعلا موضع اتهام لكن فكر إزاي تبرأه أساسًا من الاتهام ده - أقصد إنه مش مزعلك ولا اتسبب في زعلك - أنا مثلا مش عندي مشاكل خالص إني أحمل نفسي الخطأ علشان ماشوفش حد أنا وثقت فيه ماكانش أد الثقة دي ... أو أشوف حد حبيته إنه ما كانش يستاهل الحب ده ...سواء كان صاحبي أو شخص اتعاملت معاه يا ترى ممكن تتصرف انت ازاي لو صحيت م النوووم لقيت نفسك ف الموقف ده؟؟؟؟

الحياة منتدى أبو عزة

وفي منتدى ابو عزة يحلى الكلام... ولو كل الكلام يحلى ...يا ترى هيحلى شعر ولا دقن؟؟
ف الساعة اللي هيه صباحا بعد ما نزلت صليت الفجر وقعدت اتمشى شوية تحت الشتواية التلج بتاعة الفجر ... والمطرة بتنزل على راسي الصحراوية زي الكرباج ... لقيت منظر جميل عجبني جدا ....راجل كبير ماشي مع بنته ف الساعة اللي هيه الصبح بدري دي والناس لسه قايمة ورايح يوصَل بنته للدرس .... وأكيد الدرس مش المدرسة لإن مفيش مدرسة الساعة 6 الصبح ....يوووه أديني وقعت بلساني وقلت الساعة كانت كام... المهم البنت ماشية وحاضنة كتبها ....ياعيني ماتعرفش إيه اللي مستنيها بعد أيام المدرسة دي... يلا ..المهم روَحت بيتنا وأخدت الشَور بتاعي .... اللي بيسموه "دُش" وأكلت ... مش وانا تحت الدُش طبعًا ولبست هدومي ... وبرضه محدش يفتكر إني أكلت وانا .... لأ أنا لبست هدوم الخروج .... أيوه يا رخم والخروج قعد من غير هدووم... وبعدين نزلت ورُحت الموقف وفي نيتي الجهاد في المواصلات علشان أروح الشغل ...وأكيد نفهم من كده إن أنا بياع لبن علشان بروح شغلي الساعة 7 صباحا ... لكن الفكرة مش كده أنا بس حبيت افتح قبل ميعادي ب 3ساعات لإني بحب الشغل وكنت عايز أخلص حاجات وبضاعة ...يعني إيه حاجات وبضاعة ؟؟؟ ماحدش له دعوة... المهم رُحت الموقف لقيته ...اسكت هُس .. بالظبط كده فبصيت ع العربيات البيجو ..لقيتها من غير سواقين ... وسواقين المكروباص لسه بيضربوا اصطباحتهم ع الصبح ... وطبيعي جدًا الاصطباحة بتبقى ع الصبح مش ع المركب ..ولقيت حبيب قلبي الغالي اللي واحشني من أيام أول ترم ف الكلية ... وكان ده الحاجة الوحيدة اللي فيها ناس وسواق ...فقلت "إنا لله وإنا إليه راجعون " وركبت ... ومحدش يفتكر بكده إن ده دعاء السفر .. لكن قد يكون دعاء صبر على البلاء اللي منتظره من الأتوبيس ... وطلعت الأتوبيس ...أيوه ركبت الأتوبيس ورفعت العلم ... قعدت جنب الشباك ... زي أي فنان أو كاتب مابيحب يقعد ... وكان أجمل حاجة إنك تلاقي كل طوائف وعقول الشعب المصري متجمعين ف حتة واحدة ....الغبي ..تلاقي ...المفكر اللي زيي ..تلاقي ...الغتت تلاقي والمحترم أكيد هتلاقي برضه ....وركب ناس كتير من الأرياف .. وعلى رأي حلاوة صاحبي وتلاقي اللي داخل بحماره .واللي تشيلك ابنها ويبل هدومك ... وكانت حاجة زييييط
صوت القرآن مجلجل من الكاسيت ع الصبح ... مغطي عليه صوت الكمسري "الأجرة يا حضراات" وتلاقي الكل بدأ في حالة من الانحناء على اللي جنبه وكإن حصل حالة من الجرب العام ..الكل بيهرش ف جيبه علشان يطلع فلوس وصلنا بالسلامة بعد الاقتناع بإن المصري هيفضل مصري ... النيل رواه والندالة والغباء معششين ف قفاه - الراجل الواطي بيشيل من أدامي الستارة علشان يشيل عن نفسه الشمس - يعني شايف كيس جوافة قاعد مثلا ؟؟؟؟ المهم بصنعة لطافة حسسته بغلطه ..ولما حس بغلطته أخدت الستارة عليّا وسبت وشه ووش اللي جنبه يتحرق من الشمس علشان يبطلوا أنانية... ونزلت م الأتوبيس -صلاح سالم وآخر يا حضرااات - على الرغم من إنه كده كده بيكمل جوّه المنصورة .. لكن أنا بصراحة كنت عايز أتمشى ف الجو بتاع دخول المدارس ده... وسمعت الاذاعة المدرسية ...وتحيا جمهورية مصر بنت الحرمية ... وقبض عليكوا بوليس الدورية ...تلاقي الأمهات واخدين أولادهم للمدرسة والواد الصغير اللي تندب ف عينه رصاصة ... بيبص للبت الصغيرة السهتانة نظرة ما تطلعش غير من واحد محروق ف الحب ... إيه محروق ف الحب دي؟؟؟ ما علينا ... رُحت السنتر ..اللي هوه مكان شغلي ..آه اللي ببيع فيه اللبن ... وقبل ما افتح لقيت سؤال اتحدف على نفوخي ... مش عارف فيه حد كان ع السطوح ولا إيه بس سؤال طحن فعلا .... وبرضه لو صحيت من النوم... ايه اللي هيحصل لو صحيت من النوم وحسيت بإن كلك نشاط وحيوية ونفسك تضرب حد م اللي ماشيين ف الشارع على قفاه وتطلع جري ....إزاي ممكن تتفادى الأمر ده ... ويا ترى ممكن تعملها فعلا ؟؟