بتستغرب لما تبقى في مول أو مكان واسع وأنا مش
معاها
واكون بكلمها ع الموبايل وفجأة تلاقيني قدامها
وتسألني انت عرفت مكاني ازاي رغم الزحمة دي ؟
ببقى عاوز أقلش واقول لها "قلب الأم" :)
بس مش عارف بتصدقني ولا لأ لما بقول لها : انا قلبي دليلي
ست شهور واحنا سوا .. الحمدلله الذي بنعمته تتم
الصالحات
نفس القلب اللي دلّني اننا هنبقى سوا مهما طال
الوقت
نفس القلب اللي واحنا بنفترق خلّاني ببراءة الأطفال اقول لها :
اعتبرينا في رحلة وكل واحد لما يرجع من رحلته هيحكي للتاني اللي استفاده من الرحلة
دي
مش برضه الكنز في الرحلة ؟
نفس القلب اللي وعدها : يوم ما نرجع تاني ..
هنغسل قلبنا بينا من كل اللي فات
بنت قلبي .. الحتة اللي مني .. صحيح قلبي دلّني
اننا هنكون سوا بفضل ربنا
وصحيح قلبي دلّني اني هكون سعيد وانا معاكي
بس السعادة اللي تخيلتها متجيش حاجة جنب السعادة
اللي عيشتيهالي
تلات حاجات وممكن تلات آيات بفتكرهم دايماً وأنا
معاكي ولما بغرق في ملامحك
خصوصاً لما بسرح ومبقاش عارف : احنا بجد بقينا
سوا تاني؟ هو انتي انتي ؟ وانا انا ؟
التلات حاجات دول :)
الحاجة الاولى :
إن اللي ليك هيجيلك مهما طال الزمن بس ربنا
الوحيد اللي عارف الوقت والمكان المناسبين لحدوثه .. مش هو اللي خالقك وعارف مصلحتك فين ؟
وربنا واحده اللي عارف امتى لما يجيلك الحاجة دي
هتفرح بيها وامتى لما تجيلك هتفرح بيها أوي وتشكر نعمته
وإن من شيءٍ إلا عندنا خزائنه وما ننزله إلا بقدر
معلوم
الحاجة التانية :
ممكن اوي متكونش لواحدك اللي سعيد بسبب حدث معين بيحصل لك
وممكن اوي متكونش الحاجة الحلوة اللي حصلتلك دي حصلت علشانك انت
ممكن تكون حصلت
علشان الشخص التاني او علشان انسان تاني خالص غيركم
زي قصة سيدنا موسى
الطفل دايماً هو اللي
بيحتاج لأمه وبيحتاج للحنية والأمان
لكن ربنا لما ذكر عودة سيدنا موسى عليه
السلام قال :
فرددناه إلى أمه كي تقر عينها ولا تحزن ولتعلم أن
وعد الله حق ..
وبرضه من نفس القصة : إن اليقين في الله والإيمان بحاجة معينة ..
بقدر إيمانك ويقينك هتتحقق أحلامك .. بس اعمل المطلوب منك .. وخليها على الله :)
كي تقر عينها ولا تحزن (ولتعلم أن وعد الله حق) :
)
الحاجة التالتة :
قلتها في أول الكلام
انك مهما تخيلت من سعادة
ممكن ربنا مخبيهالك
وعلى قدر صبرك للحصول على الحاجة دي
بتلاقيك لما تاخدها
بتبقى أسعد مما كنت متخيل
وبتلاقي حاجات انت نفسك متخيلتهاش .. كرم من ربنا وفضل
منه
زي الجنة بالظبط .. كلنا بنتخيل حاجات في الجنة
وبنشتغل وبنعبد ربنا وبنعمل
كل اللي في ايدينا علشان في الاخر ندخل الجنة وننعم بيها
الجنة اللي احنا أصلاً
مشفناهاش
بس مؤمنين بوجودها فتلاقيها بعد كده زي ما ربنا قال :
فلا تعلم نفس ما أخفي لهم من قرة أعين جزاءً بما
كانوا يعملون
الحاجة الأخيرة :
شكلهم طلعوا 4 مش 3 زي ما كنت بقول :)
كتير بيتكلموا على الحسد لما يلاقوا حد بيتكلم عن
نعمة ربنا أنعم بيها عليك
بس انا مع حاجتين .. الأولى إني أتكلم عن نِعم ربنا
لإنه يستحق ذلك
والتانية إني أدعو ربنا يحفظني ويحفظ النعمة دي من الحسد
والزوال
وكما قال صديقنا (momken) : فأما بنعمة ربك فحدث .. و ها أنا بكِ أُحدّث
مهما قلت لربنا .. مش هوفيه شكر على نعمه :)
بنت قلبي .. و مهما قلت ..برضه مش هوفيكي حقك :)
بنت قلبي .. و مهما قلت ..برضه مش هوفيكي حقك :)
فلله الحمد رب السماوات ورب الأرض ورب العالمين :)
6 comments:
ربنا يتم لكم نعمتة ، ويرزقكم بالخلف الصالح
كتير بيتكلموا على الحسد لما يلاقوا حد بيتكلم عن نعمة ربنا أنعم بيها عليك
بس انا مع حاجتين .. الأولى إني أتكلم عن نِعم ربنا لإنه يستحق ذلك
والتانية إني أدعو ربنا يحفظني ويحفظ النعمة دي من الحسد والزوال
-----
أتفق تماما... كمان النماذج الحلوة لازم تظهر عشان تبقى قدوة مش هنفضل طول الوقت نتكلم عن التجارب اللي مش ناجحة ونسيب الجوانب المضيئة والتجارب اللي مفروض تبقى نموذج
ربنا يسعد لي قلوبكم ويقر عيونكم ببعض ويديم عليكم الانسجام والسعادة والدفا
<3 <3 :)
رئيس جمهورية نفسي
يارب ويتملك الخير ويرزقك بكل الفرح والسعادة يا رياسة :)
ثورة
تسلمي يا حماتي .. المشكلة عند بعض الناس إنهم بيشوفوا إنك لما تعمل كده بتكون بتفتح شباك حياتك للناس يتفرجوا عليك .. طب إيه المشكلة لما الناس تتفرج على الحاجة الحلوة عندك .. طالما انت حامل رسالة عرّف الناس الحلو اللي فيها وخليك نموذج للحلو مش تبقى مصدر للأحزان والكآبة اللي حواليك :D
يا رب ديما فى صحة و سعاده و هنا و ربنا يزيدك من نعيمه ديما ديما
:)
من حسن حظى انى عرفت البلوج دة يمكن حضرتك فكرتنى بايام زمان اما الواحد كان بيتكلم براحته و من غيراى حسابات
انا بقالى فترة كبيرة اوى مش بكتب فى
البلوج بتاعى
و يمكن حضرتك شجعنى و من غير ما تقصد
:)
يا رب ديما فى امانه و حفظة
@Rania Lelah
ده من حسن حظي أنا رانيا هانم مرورك عندي ويارب يديم سعادتك وفرحتك دايماً وتشرفينا علطول في القهوة المتواضعة بتاعتنا :)
Post a Comment