
قاعدين في الفصل 3 / 2 (بلوجر) خير اللهم اجعله خير ولقيت أبلة هوندا داخلة علينا ف حصة ( اديني تاج على مهلك يا أستاذ) وطلعنا الكشاكييييل والاقلام وقالت كل واحد يضرب اللي جنبه بالقلم على قفاه .... ليه بس يا أبلة؟؟؟ طب مين عمل إيه علشان نعمل كده؟؟
قالك هو كده وخلاص
ماااعلينا
عطاتنا واجب نحله ف البيت وكل واحد يكتب تحت إشراف الأستاذ بتاعه
وآآآآآدي الواااااجب
قوانين الواجب:
قوانين الواجب:
أذكر اسم من طلب منك حل هذا الواجب
س : أذكر 6 أسرار قد لا يكتشفها من يقابلك أول مرة
6 أسرار؟؟؟
طب لو قلتهم هيبقوا سر إزاي؟؟؟
طب ممكن اقول 6 أسرار اللي يقابلني اول مرة هيلاقيهم ف تاني مرة؟؟؟
طب ينفع اقول 6 اسرار اللي يقابلني ف أي مرة ممكن يلاقيهم مرة؟؟؟
طب هو كام مرة ف 6 مرات يعطوا سر واحد ؟؟؟
طب لو ال6 ف 9 ب 54 يبقى ال8 أسرار ييجوا على كام واحد وف كام مرة؟؟؟
طب هو ال 6 أسرار دول أنا عارفهم؟؟ ولا هو اللي عارفهم ؟؟ ولا انتو اللي عارفينهم ومخبيين وبتضحكوا وايديكم على بقكم ؟؟؟
طب يعني اجاوب؟؟؟
بسم الله الله المستعاااان
السر الأول
وضرب مسرور النااااقوس وزي مسرحية تخاريف ..... الغضب
الغضب يا حورية بيخلي ابن ال... اللي بره اللي عمال يضرب في الكلاكس ده لو مبطلش انا هطلع ا .... تيييييييييييت
أنا سريع الغضب .... لكن مش بيبان على وشي أو معادش بيبان عليا يعني بمعنى أوضح ..... لكن ساعة الغلط ... نطرطش ظلط
السر التاني .... اضرب يا مسرووووووور .... رومانسي عاااااا
أنا رومانسي جدا بخلاف ما بيبان على مظهري ... ممكن أعيط من كلمة مؤثرة أو أضحك لغاية ما عيوني تدمع ممكن مشهد أو قصة بقرأها أو أشوف حد بحبه .... بس برضه بعيط بعدين يعني مش وانا ف وسط الناس علشان محدش يتصدم
السر التالت ..... رد فعلي غير متوقع لأي حد
يعني ممكن تقوللي صاحبك فلان مات تلاقيني ابتسمت وقلت طب وإيه النظام معنى كده إننا مش هنطلع الرحلة؟؟؟
ومش معنى كده إني مش بتفاعل مع الحدث ... بس كوني غيرت الموضوع كده فده معناها إني مش قادر أتحمل الخبر فبعمل رد فعل بعيد تماماً عن الحدث علشان مش بعرف أفكر ولا أحس بالحاجة غير وانا جوه حضني انا ... معلش مجنون حبتين
السر الرابـع ..... لو سلمت عليك بإيدي ف أول مقابلة يبقى انا معجب بيك وبشخصيتك
السر الخامس ... أنا مش بعرف أبص لحد وانا بكلمه ... وده مش سر ... لكن السر إني لو بصيت لحد وانا بكلمه ف ده معناها انه جوايا اوي أو عجبني أوي او عايز اشبع منه اوووي حتى لو أول لقاء بيننا
لما بصحى م النوم الصبح أدخل آخد شاور أشيل البخار من ع المراية أبصلي في المراية وأصبح عليا وأقول صباح الخير يا سكايار ربنا يسعد بيك الناس ... آه والله بقول كده .... وابتسم لنفسي وأطلع أبدأ يومي
لو فيه سؤال زيادة اختياري عن الاسرار علشان حبيت أحطه ف الختام
السر السابـع .... أنا بحب الموت بقدر ما بحب الحياة
أي حاجة فيهم ربنا يكون راضي بيها عني فأنا أحبها .... أحب إني أشوف جسمي أدامي متقطع لو ده يخليني أشوف الناس بتقرب من ربنا .... بحب ربنا أوي ... بشوف كوني إنسان ف دي نعمة من ربنا .... وأي حد بشوفه ولو لمرة مش بنساه لإني بعتبره اتكتب في صحيفتي يا إما ف الحسنات يا إما في السيئات ... وغالباً بدعي لكل حد بشوفه ... حتى لو شفت حد ماشي في الشارع ومالناش علاقة ببعض ولا كلمنا بعض .... بس بحب أدعي أوي للناس
وأخيراً
مرر التاج لـ6 أشخاص مدونين
خد ياض انت وهو التاج ده بس محدش يغش من كشكولي أصل الأبلة صعبة عاااااا




