.....أكثر من قول لا حول ولا قوة إلا بالله العلي العظيم,فإنها كنزمن كنوز الجنة..حديث صحيح......,ما أسفل الكعبين من الإزار فهو في النار..رواه البخاري والنسائي..,يا رسول الله أنهلك وفينا الصالحون؟؟..قال نعم ,إذا كثر الخبث (متفق عليه)..,الوالد أوسط أبواب الجنة..فإن شئت فأضع هذا الباب أو احفظه...,لا يدخل الجنة قاطع ..أي قاطع رحم..(متفق عليه)...,الحياء شعبةمن الايمان ..حديث صحيح..آية الإيمان حب الأنصار..وأية النفاق بغض الأنصار..(رواه البخاري)..من أشار إلي أخيه بحديدة فإن الملائكة تلعنه حتي ينتهي (رواه مسلم)...,سباب المسلم فسوق وقتاله كفر ..(متفق عليه)...,بحسب امرئٍ من الشر أن يحقر أخاه المسلم..(رواه البخاري ومسلم وأصحاب السنن)..ما تواضع أحد لله إلا رفعه ,وما زاد الله عبدا بعفوٍ إلا عزاً...,وتجد شر الناس ذا الوجهين..,الذي يأتي هؤلاء بوجه..وهؤلاء بوجه..(رواه البخاري ومسلم ومالك)...,ذمة المسلمين واحدة ,يسعي بها إدناهم.فمن أخفر مسلما فعليه لعنة الله والملائكة والناس أجمعين.لا يقبل الله منه يوم القيامة عدلاً ولا صرفاً..(رواه مسلم وغيره)...لو أنكم تتوكلون علي الله حق التوكل...لرزقكم كما يرزق الطير..تغدو خماصاً وتروح بطاناً..(رواه أحمد وصححه الألباني)....,إن الله تعالي يبسط يده بالليل ليتوب مسئ النهار..,ويبسط يده بالنهار ليتوب مسئ الليل..حتي تطلع الشمس من مغربها ...(رواه مسلم)...يقول الله-عزوجل- أخرجوا من النار من ذكرني يوماً أو خافني في مقام..رواه البيهقي والترمذي..وقال حديث حسن.....اتقوا الله..وصلوا خمسكم,وصوموا شهركم,وأدوا زكاة أموالكم,وأطيعوا أمراءكم..تدخلوا جنة ربكم..رواه الترمذي..وقال حديث حسن صحيح....,« . . . وهل يكب الناس على وجوههم أو على مناخرهم إلا حصائد ألسنتهم » [رواه الترمذي]....,« إن العبد ليتكلم بالكلمة ما يتبين فيها، يزل بها إلى النار أبعد مما بين المشرق والمغرب » [متفق عليه]....,«اللهم إني أسألك فعل الخيرات وترك المنكرات وحب المساكين،وإذا أردت في الناس فتنة فاقبضني إليك غير مفتون» أخرجه مالك والترمذي..,«ما من مسلم يصيبه أذى, من مرض فما سواه إلا حط الله به سيئاته كما تحط الشجرة ورقها» أخرجه البخاري ومسلم..,«لا يموتن أحدكم إلا وهو يحسن الظن بالله» أخرجه البخاري ومسلم...,«أعذر الله إلى امرئ أخر أجله حتى بلغ ستين سنة» أخرجه البخاري. أي لم يبق عذر لمن بلغ الستين من العمر...,«لا تقوم الساعة حتى تخرج نار من أرض الحجاز تضيء أعناق الإبل ببصرى» أخرجه البخاري ومسلم...,«يقبض الله الأرض يوم القيامة, ويطوي السماء بيمينه, ثم يقول: أنا الملك أين ملوك الأرض» أخرجه البخاري ومسلم...,«ما من صباح إلا وملكان يقولان: يا طالب الخير أقبل, ويا طالب الشر أقصر, وملكان موكلان يقولان: اللهم أعط منفقاً خلفاً, وأعط ممسكاً تلفاً» أخرجه البخاري مختصراً وأحمد..,إذا أراد الله بقوم عذاباً أصاب العذاب من كان فيهم, ثم بعثوا على نياتهم» أخرجه البخاري ومسلم..,« أول ما يقضى بين الناس يوم القيامة في الدماء» أخرجه البخاري ومسلم والنسائي والترمذي..,مثل الصلوات الخمس كمثل نهر جار غمر على باب أحدكم يغتسل منه كل يوم خمس مرات> رَوَاهُ مُسلِمٌ...,يتعاقبون فيكم ملائكة بالليل وملائكة بالنهار، ويجتمعون في صلاة الصبح وصلاة العصر، ثم يعرج الذين باتوا فيكم فيسألهم وهو أعلم بهم: كيف تركتم عبادي؟ فيقولون: تركناهم وهم يصلون وأتيناهم وهم يصلون> مُتَّفَقٌ عَلَيهِ...,من غدا إلى...,بشروا المشائين في الظلم إلى المساجد بالنور التام يوم القيامة> رَوَاهُ أبُو دَاوُدَ وَالتِّرمِذِيُّ...,من شهد العشاء في جماعة كان له قيام نصف ليلة، ومن صلى العشاء والفجر في جماعة كان له كقيام ليلة> قال الترمذي حديث حسن صحيح....,إن بين الرجل وبين الشرك والكفر ترك الصلاة> رَوَاهُ مُسلِمٌ...,إن أول ما يحاسب به العبد يوم القيامة من عمله صلاته، فإن صلحت فقد أفلح وأنجح، وإن فسدت فقد خاب وخسر، فإن انتقص من فريضته شيئاً قال الرب عز وجل: انظروا هل لعبدي من تطوع فيكمل بها ما انتقص من الفريضة؟ ثم تكون سائر أعماله على هذا> رَوَاهُ التِّرمِذِيُّ وَقَالَ حَدِيثٌ حَسَنٌ...,خير صفوف الرجال أولها وشرها آخرها. وخير صفوف النساء آخرها وشرها أولها> رَوَاهُ مُسلِمٌ...,أقيموا الصفوف، وحاذوا بين المناكب، وسدوا الخلل، ولينوا بأيدي إخوانكم، ولا تذروا فرجات للشيطان، ومن وصل صفاً وصله اللَّه، ومن قطع صفاً قطعه اللَّه> رَوَاهُ أبُو دَاوُدَ بإسناد صحيح....,عن عائشة رَضِيَ اللَّهُ عَنها أن النبي صَلَّى اللَّهُ عَلَيهِ وَسَلَّم كان لا يدع أربعاً قبل الظهر، وركعتين قبل الغداة. رَوَاهُ البُخَارِيُّ...,عن ابن عمر رَضِيَ اللَّهُ عَنهُما أنهما سمعا رَسُول اللَّهِ صَلَّى اللَّهُ عَلَيهِ وَسَلَّم يقول على أعواد منبره: <لينتهين أقوام عن ودعهم الجمعات أو ليختمن اللَّه على قلوبهم ثم ليكونن من الغافلين> رَوَاهُ مُسلِمٌ...,إذا دخل أهل الجنة الجنة يقول اللَّه تبارك وتعالى: تريدون شيئاً أزيدكم؟ فيقولون: ألم تبيض وجوهنا؟ ألم تدخلنا الجنة، وتنجنا من النار؟ فيكشف الحجاب، فما أعطوا شيئاً أحب إليهم من النظر إلى ربهم> رَوَاهُ مُسْلِمٌ...,إن في الجنة شجرة يسير الراكب الجواد المضمَّر السريع مائة سنة ما يقطعها> مُتَّفَقٌ عَلَيْهِ...,قال اللَّه تعالى: يا ابن آدم إنك ما دعوتني ورجوتني غفرت لك على ما كان منك ولا أبالي، يا ابن آدم لو بلغت ذنوبك عنان السماء ثم استغفرتني غفرت لك ولا أبالي، يا ابن آدم إنك لو أتيتني بقراب الأرض خطايا ثم لقيتني لا تشرك بي شيئاً لأتيتك بقرابها مغفرة> رَوَاهُ الْتِّرْمِذِيُّ وَقَالَ حَدِيْثٌ حَسَنٌ...,لا تخصوا ليلة الجمعة بقيام من بين الليالي، ولا تخصوا يوم الجمعة بصيام من بين الأيام إلا أن يكون في صوم يصومه أحدكم> رَوَاهُ مُسْلِمٌ.....,لا صلاة بحضرة طعام، ولا هو يدافعه الأخبثان> رَوَاهُ مُسْلِمٌ....,: <إذا دعا الرجل امرأته إلى فراشه فأبت فبات غضبان عليها لعنتها الملائكة حتى تصبح> مُتَّفَقٌ عَلَيْهِ....,لا تباشر المرأة المرأة فتصفها لزوجها كأنه ينظر إليها> مُتَّفَقٌ عَلَيْهِ.....,لا تسموا العنب الكرم؛ فإن الكرم المسلم> مُتَّفَقٌ عَلَيْهِ، وهذا لفظ مسلم....,(من أحدث في أمرنا هـذا مـا لـيـس مـنه فهـو رد ). متفق عليه...,عن أبـي رقــيـة تمـيم بن أوس الـداري رضي الله عنه ، أن النبي صلى الله عـليه وسـلم قـال :( الـديـن النصيحة )....,ما نهيتكم عنه فاجتنبوه ، وما أمرتكم به فأتوا منه ما استطعتم ، فإنما أهلك الذين من قبلكم كثرة مسائلهم واختلافهم على انبيائهم ). رواه البخاري ومسلم....,( دع ما يـريـبـك إلى ما لا يـريـبـك ).رواه النسائي والترمذي وقال حديث حسن صحيح...,( من حسن إسلام المرء تركه ما لا يعـنيه ) .حديث حسن ، رواه الترمذي وابن ماجه....,( لا يحل دم امرىء مسلم [ يشهد أن لا إله إلا الله ، وأني رسول الله ] إلا بـإحـدي ثـلاث : الـثـيـب الــزاني ، والـنـفـس بـالنفس ، والـتـارك لـد يـنـه الـمـفـارق للـجـمـاعـة ).متفق عليه..,( اتـق الله حيثما كنت ، وأتبع السيئة الحسنة تمحها ، وخالق الناس بخـلـق حـسـن ).رواه الترمذي وقال : حديث حسن ، وفي بعض النسخ : حسن صحيح ..,عـن أبي العـباس عـبد الله بن عـباس رضي الله عـنهما ، قــال : كـنت خـلـف النبي صلي الله عـليه وسلم يـوما ، فـقـال : ( يـا غـلام ! إني اعـلمك كــلمات : احـفـظ الله يـحـفـظـك ، احـفـظ الله تجده تجاهـك ، إذا سـألت فـاسأل الله ، وإذا اسـتعـنت فـاسـتـعـن بالله ، واعـلم أن الأمـة لـو اجـتمـعـت عـلى أن يـنـفـعـوك بشيء لم يـنـفـعـوك إلا بشيء قـد كـتـبـه الله لك ، وإن اجتمعـوا عـلى أن يـضـروك بشيء لـم يـضـروك إلا بشيء قـد كـتـبـه الله عـلـيـك ؛ رفـعـت الأقــلام ، وجـفـت الـصـحـف ).رواه الترمذي [وقال : حديث حسن صحيح إن مما أدرك الناس من كلام النبوة الأولى : إذا لم تستح فاصنع ما شئت ).رواه البخاري ...,( الطهور شطر الإيمان ، والحمد لله تملأ الميزان ، وسبحان الله والحمد لله تملأن – أو : تملأ – ما بين السماء والأرض ، والصلاة نور ، والصدقة برهان ، والصبر ضياء ، والقرآن حجة لك أو عليك ؛ كل الناس يغدو ، فبائع نفسه فمعتقها ، أو موبقها ..رواه مسلم ...,كل سلامى من الناس عليه صدقة كل يوم تطلع فيه الشمس تعدل بين اثنين صدقة ، وتعين الرجل فى دابته فتحمله عليها أو ترفع له عليها متاعة صدقة ، والكلمة الطيبة صدقة ، وبكل خطوة تمشيها إلي الصلاة صدقة ، وتميط الأذي عن الطريق صدقة ).رواه البخاري ومسلم...,: ( من رأى منكم منكرًا فلغيره بيده ، فإن لم يستطع فبلسانه ، فإن لم يستطع فبقلبه ، وذلك أضعـف الإيمان ).رواه مسلم ...,( لا تحاسدوا ، ولا تناجشوا ، ولا تباغضوا ، ولا تدابروا ، ولا يبع بعضكم على بيع بعض ، وكونوا عباد الله إخوانا ، المسلم خو المسلم ، لا يظلمه ولا يخذله ، ولا يكذبه ، ولا يحقره ، التقوى ها هنا ) ويشير صلى الله عليه وسلم إلى صدره ثلاث مرات – ( بحسب امرىء أن يحقر أخاه المسلم ، كل المسلم على المسلم حرام : دمه وماله وعرضه ).رواه مسلم ...,( إن الله تعالى كتب الحسنات والسيئات ، ثم بين ذلك ، فمن هم بحسنة فلم يعملها كتبها الله عنده حسنة كاملة ، وإن هم بها فعملها كتبها الله تعالى عنده عشر حسنات إلى سبعمائة ضعف إلى أضعاف كثيرة ، وإن هم بسيئة فلم يعملها كتبها الله عنده حسنة كاملة ، وإن هم بها فعملها كتبها الله عنده سيئة واحدة ).رواه البخاري ومسلم...,( كن في الدنيا كـأنـك غـريـب أو عـابـر سبـيـل ).وكـان ابـن عـمـر رضي الله عـنهـما يقول : إذا أمسيت فلا تـنـتـظـر الصباح ، وإذا أصبحت فلا تـنـتـظـر المساء ، وخذ من صحـتـك لـمـرضـك ، ومن حـياتـك لـمـوتـك ...رواه البخاري ...,( لا يؤمن أحدكم حتي يكون هواه تبعا لما جئت به ..حديث حسن صحيح ...,..سبحانك اللهم وبحمدك أشهد أن لا إله إلا أنت ..أستغفرك وأتوب إليك

Tuesday, April 21, 2020

كوفيد ١٩ .. حالة طوارئ جيم

صباح الخير .. مساء السعادة 
اللبس الوقائي اللي بيلبسه حاليًا الأطباء اللي بيعالجوا أو يستقبلوا حالات الكورونا بيفكرني علطول باللبس اللي كان بيلبسه قوات مكافحة الأطفال في فيلم شركة المرعبين المحدودة Monsters Inc  .. بس يا ريته كان فيلم كارتون ويخلص.

الموضوع كتير مننا أخدناه بتهريج ، اتتريقنا ، نشرنا نكت ، اتفقنا واختلفنا على نوعية المؤامرة وإن كانت أساسًا مؤامرة ولا لأ ، لكن يبقى الشيء الوحيد اللي اعترفنا بيه حاليًا وهو إن الأمر جد وخطير وربنا يحفظنا ويعافينا ويزيل الغمة دي على خير ويبعده عننا احنا وكل اللي بنحبهم

الوقفة اللي محتاجين نقفها حاليًا مهمة في حاضرنا ومهمة لمستقبلنا لمّا ربنا يكتبلنا الخير ونطلع من الأزمة دي على خير إن شاء الله.

الدنيا وقفت .. أعمال انهارت .. بلاد اقتصادها وقع .. مدن ساكنة تمامًا .. ومدن أصبحت بلاد أشباح .. جو مليء بالحزن والخوف والاكتئاب.

ممكن توقف الصورة على كده ، وتسأل نفسك :
 أنا بعمل إيه؟ 
أنا وصلت لكده إزاي؟
أنا راضي عن اللي وصلتله؟
محتاج لإيه علشان أكمل طريقي؟
ومحتاج لإيه علشان أرجع للطريق اللي تهت منه؟
الوقت ده هو التوقيت المناسب ، دايمًا الصدمات والابتلاءات بتكون منحة من ربنا علشان نتأمل الحال ونفكّر محتاجين نعمل إيه ؟ محتاجين نكمل زي ما احنا؟ ولا محتاجين نتغيّر ؟ والناجح اللي بيستغل الفرصة لما بتيجي ، الورقة اللي زمان أغلبنا عملها مقسومة نصين نص مميزات ونص عيوب ونبدأ نفكر إيه محتاج يتغيّر وإيه محتاج يستمر
امتى آخر مرة اتواصلت مع ناس بيحبوك؟
امتى آخر مرة سامحت ناس زعلتك؟
امتى آخر مرة عملت خير لغيرك ؟
امتى آخر مرة دخلت على نفسك السعادة وقعدت راضي ومبسوط؟
وامتى اخر مرة أسعدت غيرك وساعدتهم؟
امتى آخر مرة قربت من ربنا ودعيته بإخلاص ليك أو لغيرك؟ 
أسئلة كتيرة محتاجة إجابات ومش بس على الجانب الاجتماعي أو الديني لأ، والعملي كمان.. وصلت لفين في أهدافك وشغلك وحياتك ومشاريعك؟
حققت إيه ومحققتش إيه ومحتاج تقوّيه؟
 Stay safe على قد ما تقدروا .. stay safe مش بس من الفيروس والوباء ده ، stay safe من الحياة اللي أخدتنا من نفسنا ومن حبايبنا ومن أهدافنا .. stay safe لإنكم مهمين وتستحقوا ده 
ليكم المحبة واشوفكم تاني قريب
رمضان كريم على الجميع

Thursday, January 21, 2016

خزعبلات حياتية


بداية ما تعرفوش أد إيه أنا سعيد بكمية التعليقات اللي جت على التدوينة الأخيرة اللي كتبتها في فبراير 2014

 

صحيح لو حد فتح التدوينة هيلاقي مفيش أي تعليقات تم نشرها .. بس بأكدلكوا إن التعليقات كانت كتير أوي من شركة تنظيف بتعمل دعاية :) علشان كده مش هتلاقوا الخمسين كوبي بيست تعليق بتاعهم ده منشور ... #انشر_بإيجابية

 

سنتين كتير على إن الواحد ميكتبش حاجة على التدوينة ... مع إن فيه ناس بقالها ست سنين مكتبتش حاجة ومعدناش نعرف عنهم حاجة ... #انشر_بسلبية

 

الحقيقة إن الكتير هو إنك تقعد سنتين مش بتتواصل مع أي حد من اللي تعرفهم أو يعرفوك ولمّا يتصلوا عليك متردّش ولما تردّ تبقى زي اللي تم استنزافه بدون انذار فمش عارف تتكلم بقلب مفتوح أو بصدر رحب مع حد #انشر_غسيلك_اللي_مش_نضيف

 

الحياة أخدتنا بعيد أوي عن كل حاجة وكل الناس اللي اتعودنا عليهم

 

بما إني من الناس اللي عايشة حالياً بره البلد .. فأحب أقول للناس اللي جوه البلد أنا اتخنقت أوي لما جيت اجازة .. مش علشان البلد وحشة ولا علشان انتو وحشين .. أبداً انتو حلوين .. بس خلينا اخوات أحسن .. أنا خايف عليكم أعذبكم معايا #مايصحش_كده

 

الناس في مصر فقدت يوسف داوود ..فقدت الـ كونسبت بتاع "الحمدلله" بشكل معادش ينفع معاه غير لا حول ولا قوة إلا بالله

 أنا بقيت مدمن شغل .. لدرجة إني نزلت مصر بعد تلات سنين من غير اجازة وتاني يوم في الاجازة كنت ببعت إيميل وانا في مصر من جهاز الشغل في البلد التانية .. #شفت_الإدمان_بيعمل_إيه

 

أنا مفتقد لأصحابي وقعدتنا في مصر في أي مكان في أي وقت بدون ما نحسب ورانا إيه أو لازم نبقى فين الساعة كام

 

كل اللي كلمتهم وأنا في مصر في الاجازة وبعد ما رجعت من مصر بيأكدولي إن هما كمان مفتقدين نفس الحاجة وإن معادش حد بيقعد مع حد لإن الدنيا دوّارة و مرجيحة وزحليقة وصفّارة

 

ربنا يكون في عون بنت قلبي معايا #زوجتي_الصبورة

 

كل ما بيظهر من الخفاء صوت إليسا بفتكر يوم شتوي دافئ  شفت فيه جواز سفر صديقي"عاشق الروح" وصدمتي لمّا افتكرته بيجهّز للسفر ومعرفنيش ... وأنا اللي سافرت في الآخر #هربت_منيهم

 

اللي فاكرين كلامي زمان عن الغربة وخوفي من إني أتحوّل لآلة معدن زي كل اللي شفتهم هنا من سنين .. أحب أبشّركم .. أنا بقيت آلة معدن زي كل اللي شفتهم هنا من سنين #انشر_وشارك_بالأجر

 

الحاجة الوحيدة اللي لسه بتخليني أحس بإنسانيتي هما التلاتة التالي ألقابهم

 

بنت قلبي#زوجتي      أخويا#الكبير      عاشق الروح #الخَل_الوفي بس هاته من أبو إزازة بلاستيك مش من أبو إزازة إزاز

 

 كل الشكر والتقدير لشركة التنظيف اللي هتونّسني بتعليقاتها بدلاً عن أصدقاء البرنامج :)

 

 

Monday, February 17, 2014

أعزائي حلمي وكنزي




صباحكم محبة ومساءكم رضى


ماكنتش منتظر مناسبة محددة علشان أكتب التدوينة دي

 لكن جت الصدفة بإن بعد كام يوم هيكون عيد ميلاد مدونتي العزيزة على قلبي والقريبة من روحي مدونة الحياة .. لما تصحى من النوم

ها بقى ؟ ازيكم عاملين ايه ؟

التدوينة دي خاصة جداً

وموجهة لأشخاص بعينهم جداً جداً

فاكرين الايميلات اللي بعتهالكم قبل سفري ؟

الوصايا اللي بعتتها لكل واحد فيكم .. الحاجات الحلوة اللي فيه .. والحاجات اللي محتاج يشتغل عليها

أنا ماكنتش ولا هكون كبير بالقدر الكافي علشان أكون أفضل من حد وأوجه له النصح
لكن دي كانت رسايل انسان عابر ربنا رزقه بيكم ورزقكم بيه في وقت من الأوقات

هل يا ترى طلع الكنز في الرحلة فعلاً ؟

حققتم الحلم ؟ أو .. وصلتم للكنز ؟

طيب لسه فاكرينها سايبة ؟

عدّا علينا أكتر من 6 سنين من وقت كتابة الرسايل ومن وقت وداعي ليكم

كل واحد فينا اتغيّر في حياته كتير

عاش تجارب أكبر من اللي كانت ممكن تيجي على باله

ماحدش وقف مكانه .. الكل بيتحرك

الخيط .. وكائن .. حتى اللي كانوا وقتها كتاكيت زي ملكة البنات و جو كوكو الضعيف و 


أنا قصدت أحط لينكات المدونات علشان ترجعوا تشوفوا جزء منكم زمان وتجربة قديمة زي تجربة التدوين


أحب أقولكم على حبة حاجات في السريع

في الست سنين دول :

سبتكم وسافرت زيارة – زي ما انتو عارفين – واشتغلت في الخليج المشوي


سكنت مع عمال (بتوع طوب وأسمنت وبنا) و كان ساكن معايا في نفس الغرفة راجل كبير في السن كان قهوجي

لما معادش له شغل كان بينزل ينضف الفلل والشقق مقابل 100 درهم علشان يبعت لولاده العيدية في عيد الفطر

سكنت بعدها مع شاب تونسي وشاب سوري .. كان واحد فيهم كل خميس وجمعة قاعد يسكر في البيت والتاني بيجيب بنات في اوضته .. اكيد مش بيلعبوا كوتشينة البنات دي

سكن معايا واحد من حبه لدفا الصحاب والاهل والاحبة .. لما اتقطع النت 3 ايام في البيت كان بيطلع البلكونة يعيط ويحس بإنه مش قادر يكمل في البلد دي .. ولما قرأت عليه قصيدة "أبويا في الخليج" خد شنطته وسافر

قابلت صاحب مدونة طهقان المشهورة اللي كنا كلنا بنحب نقرأ تدويناته وبنته الصغنونة – وقتها – جت قعدت على رجلي تعزفلي على الاورج مقطوعة لسه متعلماها

كوّنت في الست سنين دول صداقة قوية – توصل لمقام الأخوة - مع شخصين من كل الناس اللي عرفتهم هنا .. طبعاً المدونين اللي قابلتهم هنا أو زمايل الكلية اللي قابلتهم هنا برضه ميتحسبوش لإننا نعرف بعض من قبلها : )

شفت ناس بتبيع ضميرها وبتبيع اصحابها وبتبيع كل حاجة تقدر تبيعها علشان تفضل مكملة في شغلها

مش مشكلة لما تنتهي مصلحتك مع واحد تبيعه عند أقرب ماركت .. المهم انك لسه مكمل – دي كانت فكرتهم

قريب – ان شاء الله – هكون مدير للمكان اللي جيت اشتغلت فيه من ست سنين – ده تايتل بس متطمعوش الناس دي بخيلة جداً يعني : )

 وشايف إني قابلت من البشر في الست سنين دي أسوء ما على الأرض من جشع وظلم وسوء كل حاجة ممكن تيجي في بالك

اتجوزت انا وبطوطة – زي ما كلكم عارفين – وفي الفترة اللي سبقت تحقيق الحلم ده اتعلمت معنى الصبر واليقين في الله وإن الطوال أكتر ناس بيتمسكوا بالأمل من غير ما يشنقوا نفسهم بيه : )

وشفت ازاي ان ربنا ممكن يمنع عنك حاجة بتتمناها علشان يعطيهالك في وقت مناسب هيكون أفيد ليك وأكتر فرحة وهتعرف تشكر نعمته عليك وتحس بيها بشكل أحسن ويرضيك

كده اختصرتلكم الست سنين اللي فاتت .. مش مضطر أبعت لكل واحد فيكم إيميل : )

بس عاوز اقولكم .. تجربتي معاكم كانت بتخليني فخور اني عرفتكم في سنة من السنين

كل واحد فينا عنده مميزات وحاجات حلوة .. وفيه عيوب يقدر يتغلب عليها

وكل واحد فينا اتّغيرت علاقته بين قرب وبُعد مع حد تاني في الجروب .. في التطور الطبيعي للحاجة الساقعة اللي بتعمله الحياة  

متهيألي كلنا نضجنا بما فيه الكفاية علشان نقعد مع نفسنا أو نقعد مع بعض وتتحل كل الحاجات دي بالكلام سواء عن اللحظات الحلوة .. أو الحاجات اللي كل واحد شايلها في نفسه من التاني

أنا بشكركم أكيد علشان ربنا جعلكم سبب في حاجات حلوة في حياتي وإني في فترة من الفترات كنت بسترجع كلامكم عنّي علشان أقدر أقف على رجلي وما اقعش ..

وبشكر بطوطة من كل قلبي وبعتبرها أكبر نعمة في حياتي واللي كانت سبب رئيسي في إني أكون أنا .. والسند اللي ربنا بعته مخصوص علشان يلحقني زي سوبر مان وانا بقع فاقد كل الأمل واليقين والثقة حتى في نفسي ...

مفيش حاجة تمنع إني أمسك التليفون أسأل على شخص بقالنا كتير متكلمناش حتى لو هو الغلطان واللي مبيسألش

مفيش حاجة تمنع إني أصفي قلبي تجاه ناس عشت معاهم لحظات حلوة حتى لو كان الوحش كتير ومانسيناهوش

احنا بنتعامل مع ربنا .. مش بنتعامل مع البشر .. شوفوا عاوزين ربنا يشوف مننا إيه وفكروا كويس .. واعملوه

كلامي ليكم مش مراهقة فكرية ولا حنين وقتي وهيروح

من ست سنين وانا ببعتلكم الايميلات قررت في نفسي إن فيه لحظة هعمل فيها تواصل معاكم كلكم مرة تانية وهيكون غالبكم معادش له علاقة ببعض

 وقلت وقتها هبعتلكم اقول لكم انا هنا وابعتلكم رسالة لاحقة بالايميل الاولاني ...

حبّوا نفسكم .. وخلّوا ربنا يشوف منكم أحلى ما فيكم

اتلمّوا .. فعل لمّ يلمُّ .. اتلمّوا في الزمخشري بمعنى : اتجمّعوا :)

Thursday, April 11, 2013

أبي العزيز .. قشطة عليك :)

كتير وقفت عند الجملة دي .. أحبب من شئت فإنك مفارقه .. وقعدت كتير أحاول أفهم الغرض من وراها

أحبه ليه طالما متفارقين ؟ إيه الحلو في إنك تحب حد – مش بتكلم عن حب ولد وبنت - وانت عارف انك هتفارقه في يوم من الأيام ؟

فكرت قبل كده لما بعدت عن حد إن كان نفسك تقول له حاجات كتير وملحقتش تقولها ؟

او ع الاقل كان نفسك تقول له حاجة قبل ما يبعد عنك ؟

يبعد سواء بالسفر أو الموت أو أي أسباب أخرى مبنية على التطور الطبيعي للحاجة الساقعة

الفترة الأخيرة ناس كتير من أصحابي والدهم أو والدتهم فارقوهم – انتقلوا إلى الأمجاد السماوية ورحمة الله .

كل ما اتخيل المشهد ده عندي – بارك الله في عمر والديّ – كنت بحس إن الواحد من غير باباه كإن ضهره عريان ..

جت في دماغي فكرة : أحبب من شئت فإنك مفارقه

 فين بصمتك في حياة الناس اللي مروا بحياتك ؟

لو اتنقلت لحياة تانية وسبت الناس اللي انت في وسطهم .. هيذكروك بالخير ؟

 مش الناس شهداء الله في الأرض؟

هيقولوا انت كنت كويس او كنت وحش

يا ترى كام واحد فينا والده او والدته ماتوا ومعرفهومش هو كان بيحبهم أد إيه ؟

ويا ترى كام واحد فينا والده ووالدته عايشين وبينهم خلافات ولما يتنقلوا لحياة تانية هيندم على فراقهم ويقول ماتوا قبل ما اعرفهم أد ايه بحبهم أو اعرفهم فضلهم عليّا ؟

جه في بالي حاجات كتير في شخصيتي كان سبب فيها والدي اللي ظاهر في علاقتنا اننا طول الوقت مختلفين
وبنتفق على نقط بسيطة جداً ممكن تتعدّ ع الصوابع – اختلاف أجيال – بس هو عارف وانا عارف احنا بنحب بعض ازاي

اتعلمت منه مثلاً ازاي اكون صريح وفي نفس الوقت احفظ ماء وجه اللي قدامي ..
امتى يكون اللي قدامك محتاج تخبطه في وشه وتقول له الحقيقة حتى لو هيزعل

( ما يزعل ولا يتفلق حتى )

وامتى يكون اللي قدامك محتاج تلفله من الشارع الجاي علشان خايف على مشاعره واحراجه فتعرفه غلطه بشكل غير مباشر

واتعلمت ان القريبين منّي واللي بحبهم أعدّيلهم أخطاءهم ومقفش عندها

 الحياة فيها كتير مش هنوقفها على حاجات بعد كام سنة هنقول ازاي زعلنا على حاجة هبلة كده ؟
بس مختلف معاه في نفس نقطة العتاب – مبعرفش اعاتب لا قريب ولا بعيد – وهو بيحب يعاتب اللي يغلط قدامه علشان بيحبه وميحبوش يغلط - بس اتفقنا على التسامح

اتعلمت منه لو حد لجألي في أي حاجة حتى لو انا محتاج اللي يساعدني .. طالما قادر اساعده لازم اساعده بكل طاقتي

 كإن الموضوع ده حياة او موت بالنسبة لي

 اوقات بحسها طيبة بزيادة ملهاش لازمة .. بس مبقدرش امنع نفسي منها

واتعلمت لو حد طلب مني مساعدة مادية وانا مش معايا غير اللي في جيبي .. بس هعرف اقضيها .. اديله اللي في جيبي – 

محدش عارف ظروف اللي قدامه عاملة ازاي

والدي كان تاجر موبيليا عنده معرض موبيليات اسمه موبيليات البيت السعيد .. وآه يا مس بيتنا سعيد :)

كان بيبيع للناس بالقسط .. شفته ازاي كان بيساعد ناس كتير في موضوع القسط ده 

لدرجة انه اوقات مكانش بياخد مقدم على الحاجة اللي بيبيعها

وكان ناس بيعدّي على قسطها شهر وسنة وكان يقابل الناس دي في أي مكان عمره ما فتح معاهم انهم متأخرين في أقساطهم

 بالعكس كان يسألهم : الدنيا معاكم تمام ؟ محتاجين أي حاجة ؟

ولدرجة انه اوقات كان بيبيع لناس بسعر التكلفة يعني من غير أي ربح وكمان بيدفع أجرة الصنايعية من جيبه

ولما كنت أسأله على اللي بيعمله ده واقول له ما انت كده هتخسر

ده مش معرض موبيليات الهلال الأحمر أصله

يرد عليا ويقوللي : طالما ربنا عاطينا الستر يبقى الحمدلله على الستر

أفضل من كل ده بالنسبة لي إن بابا ربّانا على الاستقلالية

 صحيح بنتشاور في أمورنا اللي بتبقى فيها تقارير مصيرية كتغيير حياة أو كده

 لكن في الآخر الأمر راجع لك وانت المسئول 

لذلك لما سألوه أصحابه بعد العمر الطويل ده عن (عملت إيه في الدنيا ومعاك كام ) – ماديات يعني –

رد عليهم وقال لهم : عندي 3 بنايات كل عمارة فيهم قادرة تحافظ على نفسها من غير مساعدة .. كان بيتكلم عني أنا وأخويا وأختي :)

بالرغم من كل ده .. أي حد فينا كان يقع في أي مشكلة أو عنده أزمة .. كان هو الوحيد اللي يعرف يحلهاله

آخر حاجة ممكن أقولها .. يكفيني وقوفك جنبي آخر خمس سنين

وانك اتحمّلت حاجات ميتحملهاش أي شخص عادي لمجرد انك عاوز تشوفني فرحان :) 

ربنا يباركلي في عمرك :)

قبل ما أمشي بقى .. لو أي حد جواه حاجة حلوة لأي حد

 ياريت يقولهاله قبل ما يحس إنه الوقت فات على الكلام

الحديث : حدثني جبريل فقال : يا محمد عش ما شئت فإنك ميت ، و اعمل ما شئت فإنك مجزي به ، و أحبب من شئت فإنك مفارقه ، و اعلم أن شرف المؤمن قيام الليل ، و عزه استغناؤه عن الناس – حديث صحيح

Sunday, February 17, 2013

كي تقر عينها


بتستغرب لما تبقى في مول أو مكان واسع وأنا مش معاها

واكون بكلمها ع الموبايل وفجأة تلاقيني قدامها 

وتسألني انت عرفت مكاني ازاي رغم الزحمة دي ؟

ببقى عاوز أقلش واقول لها "قلب الأم" :)

بس مش عارف بتصدقني ولا لأ لما بقول لها : انا قلبي دليلي


ست شهور واحنا سوا .. الحمدلله الذي بنعمته تتم الصالحات


نفس القلب اللي دلّني اننا هنبقى سوا مهما طال الوقت

نفس القلب اللي واحنا بنفترق خلّاني ببراءة الأطفال اقول لها :

اعتبرينا في رحلة وكل واحد لما يرجع من رحلته هيحكي للتاني اللي استفاده من الرحلة دي 

 مش برضه الكنز في الرحلة ؟

نفس القلب اللي وعدها : يوم ما نرجع تاني .. هنغسل قلبنا بينا من كل اللي فات

بنت قلبي .. الحتة اللي مني .. صحيح قلبي دلّني اننا هنكون سوا بفضل ربنا

وصحيح قلبي دلّني اني هكون سعيد وانا معاكي

بس السعادة اللي تخيلتها متجيش حاجة جنب السعادة اللي عيشتيهالي

تلات حاجات وممكن تلات آيات بفتكرهم دايماً وأنا معاكي ولما بغرق في ملامحك

خصوصاً لما بسرح ومبقاش عارف : احنا بجد بقينا سوا تاني؟ هو انتي انتي ؟ وانا انا ؟

التلات حاجات دول :)

الحاجة الاولى :

إن اللي ليك هيجيلك مهما طال الزمن بس ربنا الوحيد اللي عارف الوقت والمكان المناسبين لحدوثه .. مش هو اللي خالقك وعارف مصلحتك فين ؟

وربنا واحده اللي عارف امتى لما يجيلك الحاجة دي هتفرح بيها وامتى لما تجيلك هتفرح بيها أوي وتشكر نعمته

وإن من شيءٍ إلا عندنا خزائنه وما ننزله إلا بقدر معلوم

الحاجة التانية :

ممكن اوي متكونش لواحدك اللي سعيد بسبب حدث معين بيحصل لك

وممكن اوي متكونش الحاجة الحلوة اللي حصلتلك دي حصلت علشانك انت

 ممكن تكون حصلت علشان الشخص التاني او علشان انسان تاني خالص غيركم 

زي قصة سيدنا موسى

الطفل دايماً هو اللي بيحتاج لأمه وبيحتاج للحنية والأمان

 لكن ربنا لما ذكر عودة سيدنا موسى عليه السلام قال :

فرددناه إلى أمه كي تقر عينها ولا تحزن ولتعلم أن وعد الله حق ..

وبرضه من نفس القصة : إن اليقين في الله والإيمان بحاجة معينة .. بقدر إيمانك ويقينك هتتحقق أحلامك .. بس اعمل المطلوب منك .. وخليها على الله :)

كي تقر عينها ولا تحزن (ولتعلم أن وعد الله حق) : )

الحاجة التالتة :

قلتها في أول الكلام

 انك مهما تخيلت من سعادة ممكن ربنا مخبيهالك

وعلى قدر صبرك للحصول على الحاجة دي

بتلاقيك لما تاخدها بتبقى أسعد مما كنت متخيل

وبتلاقي حاجات انت نفسك متخيلتهاش .. كرم من ربنا وفضل منه

 زي الجنة بالظبط .. كلنا بنتخيل حاجات في الجنة

وبنشتغل وبنعبد ربنا وبنعمل كل اللي في ايدينا علشان في الاخر ندخل الجنة وننعم بيها 

الجنة اللي احنا أصلاً مشفناهاش

 بس مؤمنين بوجودها فتلاقيها بعد كده زي ما ربنا قال :

فلا تعلم نفس ما أخفي لهم من قرة أعين جزاءً بما كانوا يعملون

الحاجة الأخيرة :

شكلهم طلعوا 4 مش 3 زي ما كنت بقول :)

كتير بيتكلموا على الحسد لما يلاقوا حد بيتكلم عن نعمة ربنا أنعم بيها عليك

 بس انا مع حاجتين .. الأولى إني أتكلم عن نِعم ربنا لإنه يستحق ذلك

 والتانية إني أدعو ربنا يحفظني ويحفظ النعمة دي من الحسد والزوال

وكما قال صديقنا (momken) : فأما بنعمة ربك فحدث .. و ها أنا بكِ أُحدّث


مهما قلت لربنا ..  مش هوفيه شكر على نعمه :)

بنت قلبي .. و مهما قلت ..برضه مش هوفيكي حقك :)

فلله الحمد رب السماوات ورب الأرض ورب العالمين :)